મેલબોર્ન : ઓસ્ટ્રેલિયામાંથી એક અત્યંત રાહત અને ચમત્કારિક સમાચાર સામે આવ્યા છે, જ્યાં મેલબોર્ન શહેરની નજીક આવેલા ગીચ અને ડુંગરાળ જંગલોમાં છેલ્લા ૬ દિવસથી લાપતા થયેલો ૧૭ વર્ષીય ઓટિઝમ (Autism) પીડિત કિશોર હેમખેમ મળી આવ્યો છે. પોલીસ હેલિકોપ્ટરની સમયસૂચકતા અને સતર્કતાને કારણે આ યુવાનનો જીવ બચી ગયો છે, જેને લઈને સમગ્ર દેશમાં ખુશીની લહેર છવાઈ ગઈ છે.

પ્રાપ્ત વિગતો અનુસાર, 'વિલિયમ' નામનો આ કિશોર તેના મિત્ર સાથે મેલબોર્નથી આશરે ૧૮૫ કિલોમીટર દૂર વાલ્હાલા વિસ્તારમાં કેમ્પિંગ કરવા ગયો હતો, જ્યાં તે અચાનક રસ્તો ભટકીને જંગલમાં ખોવાઈ ગયો હતો. તેના લાપતા થવાથી પરિવાર ચિંતિત બન્યો હતો અને પોલીસ તથા રેસ્ક્યુ ટીમ દ્વારા ૧૦૦થી વધુ કર્મચારીઓની મદદથી છેલ્લા છ દિવસથી સઘન સર્ચ ઓપરેશન ચલાવવામાં આવી રહ્યું હતું.

આ રેસ્ક્યુ ઓપરેશન દરમિયાન ગુરુવારે સવારે પોલીસ હેલિકોપ્ટરના ક્રૂ મેમ્બરોએ જંગલની વચ્ચે એક નદી કિનારે સપાટ ચટ્ટાન પર સૂતેલા કિશોરને નિહાળ્યો હતો. હેલિકોપ્ટરનો અવાજ સાંભળીને જાગેલા વિલિયમે પોલીસ ટીમને થમ્બ્સ અપ (ઇશારો) આપ્યો હતો, ત્યારબાદ રેસ્ક્યુ ટીમે વિંચ મશીનની મદદથી તેને સુરક્ષિત રીતે હેલિકોપ્ટરમાં ઉપર ખેંચી લીધો હતો અને તાત્કાલિક હોસ્પિટલમાં દાખલ કર્યો હતો.

ભૂતકાળમાં પણ ઓસ્ટ્રેલિયાના આ પર્વતીય જંગલોમાં મુસાફરો કે પ્રવાસીઓના રસ્તો ભટકી જવાના કિસ્સાઓ બનતા રહ્યા છે, જેના કારણે કટોકટીની સ્થિતિમાં એર સર્વેલન્સ અને રેસ્ક્યુ ટીમોની ભૂમિકા અત્યંત મહત્વપૂર્ણ સાબિત થતી હોય છે. હાલમાં વિલિયમની તબિયત સંપૂર્ણ સ્વસ્થ હોવાનું જણાવવામાં આવી રહ્યું છે અને તેને સુરક્ષિત રીતે તેની માતા સાથે મિલન કરાવ્યા બાદ વહીવટી તંત્ર દ્વારા રાહતનો શ્વાસ લેવામાં આવ્યો છે.