અલ્મોડા (ઉત્તરાખંડ) : ઉત્તરાખંડમાંથી એક અત્યંત પ્રેરણાદાયી અને ગર્વ લેવા જેફી સમાચાર સામે આવ્યા છે. ઉત્તરાખંડના અલ્મોડા જિલ્લાના એક સામાન્ય બેચલર ઓફ આર્ટ્સ (BA) ગ્રેજ્યુએટ યુવાને પોતાની લગન અને અદભુત પ્રતિભાના બળે એ કરી બતાવ્યું છે જે મોટાભાગના લોકો માત્ર સપનામાં જ વિચારી શકે. રવિ ટામ્ટા નામના આ યુવાને કોઈપણ પ્રકારની ઔપચારિક વિજ્ઞાન કે એન્જિનિયરિંગની ડિગ્રી વગર, સતત ૧૩ વર્ષના સ્વ-શિક્ષણ (સેલ્ફ-લર્નિંગ) અને અથાક પ્રયોગો પછી ઇલેક્ટ્રિક ફ્લાઇંગ કાર (ઉડતી કાર) નો પ્રોટોટાઇપ વિકસાવી લીધો છે. તેમના આ સિંગલ-સીટર વાહન 'HAPIDA SKYNeX' એ ગત ઓગસ્ટ મહિનામાં જ પોતાની સફળ પરીક્ષણ ઉડાન પૂર્ણ કરી લીધી છે, જે વ્યક્તિગત હવાઈ ગતિશીલતા (એર મોબિલિટી) ક્ષેત્રે એક મોટી સિદ્ધિ છે.

આ અનોખા આવિષ્કાર પાછળની પ્રેરણા અંગે વાત કરીએ તો, રવિ ટામ્ટા ઉત્તરાખંડના પર્વતીય કુમાઉ પ્રદેશમાં જાગેશ્વર ધામ પાસે આવેલા કાફલીખાન ગામમાં ઉછર્યા છે. પહાડી વિસ્તારોના વળાંકવાળા અને મુશ્કેલ રસ્તાઓ પર મુસાફરી કરવાના પડકારો તેમણે ખૂબ નજીકથી જોયા હતા, ખાસ કરીને જ્યારે કટોકટીના સમયે હોસ્પિટલો જેવી આવશ્યક સેવાઓ સુધી પહોંચવા માટે લાંબો સમય લાગતો હતો. આ જ મુશ્કેલીઓએ તેમને એવું ઉડતું વાહન બનાવવાની પ્રેરણા આપી જે દૂરના અને દુર્ગમ પર્વતીય વિસ્તારોમાં ટૂંકા અંતરની મુસાફરીને અત્યંત સરળ અને ઝડપી બનાવી શકે. આ સ્વપ્નને સાકાર કરવા માટે તેમણે ૨૦૧૫ માં 'હાપિડા સ્કાય પ્રાઇવેટ લિમિટેડ' ની શરૂઆત કરી હતી અને ઓનલાઇન સંસાધનો તથા પરિવારના સહકારથી આ અટપટી ટેકનોલોજી પર કામ શરૂ કર્યું હતું.

આ ફ્લાઇંગ કારની વિશેષતાઓની વાત કરીએ તો, 'HAPIDA SKYNeX' એ સિંગલ-સીટર વાહન છે જે વર્ટિકલ ટેક-ઓફ અને લેન્ડિંગ (VTOL) માટે ડિઝાઇન કરવામાં આવ્યું છે, એટલે કે તેને ઉડવા માટે પરંપરાગત રનવેની જરૂર પડતી નથી. તેમાં હળવા વજનની ફ્રેમ, કોકપીટ અને પારદર્શક કેનોપી આપવામાં આવી છે. આ વાહન બેટરીથી સંચાલિત છે અને તેની પ્રોપલ્શન સિસ્ટમ બહુવિધ ઇલેક્ટ્રિક મોટર્સ તથા પ્રોપેલર્સનો ઉપયોગ કરે છે, જે સામાન્ય રીતે મલ્ટિરોટર ડ્રોનમાં જોવા મળે છે. આગામી સમયમાં તેની રેન્જ, બેટરી પ્રદર્શન અને વહન ક્ષમતા સુધારવા માટે વધુ પરીક્ષણો કરવામાં આવશે. અગાઉ પણ રવિએ મોબાઈલ ચાર્જ કરતા પગરખાં, દ્રષ્ટિહીન માટે સ્માર્ટ લાકડી અને વાંસ ચીરવાનું મશીન જેવી વસ્તુઓ બનાવી છે. મિકેનિક પિતાના પુત્ર રવિની આ સિદ્ધિ સમગ્ર દેશ માટે ગર્વની વાત છે.