મુંબઈ : વૈશ્વિક સ્તરે આર્થિક અને રાજકીય હલચલ વચ્ચે આજે શેરબજારોમાં ભારે અસ્થિરતા જોવા મળી હતી, જેના કારણે પૂર્વ અને પશ્ચિમના બજારો બે વિરોધી દિશામાં ગતિ કરતા નજરે પડ્યા હતા. એક તરફ જ્યાં એશિયાઈ બજારોએ આજે રોકાણકારોને ખુશખુશાલ કરી દીધા હતા અને મોટાભાગના મુખ્ય સૂચકાંકો જોરદાર વધારા સાથે બંધ થયા હતા, ત્યાં બીજી તરફ યુરોપિયન બજારો શરૂઆતથી જ દબાણ હેઠળ જોવા મળ્યા હતા અને લાલ નિશાને કારોબાર કરી રહ્યા હતા.

એશિયાઈ બજારોમાં આજે સૌથી મોટો ચમત્કાર દક્ષિણ કોરિયાના બજારમાં જોવા મળ્યો હતો. કોરિયાનો મુખ્ય ઈન્ડેક્સ 'કોસ્પી' (KOSPI) ૬.૨ ટકાથી વધુના ઐતિહાસિક અને આશ્ચર્યજનક ઉછાળા સાથે બંધ થયો હતો. આ સિવાય ટેકનોલોજી સેક્ટરની મજબૂતીને કારણે તાઇવાનનો 'તાઇએક્સ' (TAIEX) ૨ ટકા અને જાપાનનો પ્રખ્યાત 'નિક્કી ૨૨૫' (Nikkei 225) દોઢ ટકાની તેજી સાથે બંધ રહ્યા હતા. હોંગકોંગના 'હેંગસેંગ'માં ૧.૪ ટકા અને સિંગાપોરના 'સ્ટ્રેટ ટાઇમ્સ'માં પણ અંદાજે ૧.૨ ટકાનો વધારો નોંધાયો હતો. જોકે, આ તેજીની સુનામી વચ્ચે પણ ચીનનું બજાર અલિપ્ત રહ્યું હતું અને ત્યાંના 'શાંઘાઈ કમ્પોઝિટ'માં ૦.૩ ટકાનો નજીવો ઘટાડો જોવા મળ્યો હતો.

બીજી તરફ, પશ્ચિમી દેશોના બજારોમાં આજે વૈશ્વિક ચિંતાઓની સીધી અસર જોવા મળી હતી. યુરોપના તમામ પ્રમુખ શેરબજારો નકારાત્મક વલણ (રેડ ઝોન) માં ટ્રેડિંગ કરી રહ્યા હતા. જર્મનીનો મુખ્ય ઇન્ડેક્સ 'DAX' ૦.૬ ટકા સુધી ગગડ્યો હતો, જ્યારે લંડનનો 'FTSE 100' પણ ૦.૧ ટકાના ઘટાડા સાથે સંઘર્ષ કરતો જોવા મળ્યો હતો. આ ઉપરાંત ફ્રાન્સના 'CAC 40' માં પણ નજીવો ઘટાડો નોંધાયો હતો. નિષ્ણાતોના મતે, ભૌગોલિક-રાજકીય તણાવ અને તેલના વધતા ભાવોને કારણે યુરોપિયન બજારોમાં સાવચેતીભર્યું વલણ અપનાવવામાં આવી રહ્યું છે.