નવી દિલ્હી, તા.૩૦: વડાપ્રધાન નરેન્દ્ર મોદીની અધ્યક્ષતામાં યોજાયેલી કેન્દ્રીય કેબિનેટ બેઠકમાં દેશના અર્થતંત્ર, કૃષિ ક્ષેત્ર અને ઈન્ફ્રાસ્ટ્રક્ચરને મોટો બૂસ્ટર ડોઝ આપતા રૂ. ૨.૮ લાખ કરોડના મહત્ત્વપૂર્ણ નિર્ણયોને મંજૂરી આપવામાં આવી છે. આ બેઠકમાં ખેડૂતોની આવક વધારવા માટે રવિ માર્કેટિંગ સીઝન ૨૦૨૭-૨૮ માટે MSPમાં મોટો વધારો કરવામાં આવ્યો છે, તો બીજી તરફ દેશમાં અવિરત ગ્રીન એનર્જી સપ્લાય અને દિલ્હી NCRમાં સ્માર્ટ ટ્રાફિક વ્યવસ્થા માટે રૂ. ૨ લાખ કરોડથી વધુની યોજનાઓને મંજૂરી અપાઈ છે.

રવિ પાકોના MSPમાં જંગી વધારો: ઘઉંનો ભાવ રૂ. ૨૬૧૦ થયો

કેબિનેટ કમિટી ઓન ઈકોનોમિક અફેર્સ (CCEA) એ ૨૦૨૭-૨૮ની રવિ સીઝન માટે તમામ નિર્ધારિત પાકોના ટેકાના ભાવ (MSP) વધાર્યા છે:

•    ઘઉં: રૂ. ૨૫ નો વધારો સાથે નવો ભાવ રૂ. ૨૬૧૦ પ્રતિ ક્વિન્ટલ

•    કેસર (Kusum): સૌથી વધુ રૂ. ૬૭૫ નો વધારો સાથે નવો ભાવ રૂ. ૭૨૧૫ પ્રતિ ક્વિન્ટલ

•    રાયડો (Rapeseed/Mustard): રૂ. ૪૧૩ ના વધારા સાથે રૂ. ૬૬૧૩ પ્રતિ ક્વિન્ટલ

•    મસૂર: રૂ. ૩૯૦ ના વધારા સાથે રૂ. ૭૩૯૦ પ્રતિ ક્વિન્ટલ

•    જવ: રૂ. ૧૩૬ ના વધારા સાથે રૂ. ૨૨૮૬ પ્રતિ ક્વિન્ટલ

•    ચણા: રૂ. ૮૩ ના વધારા સાથે રૂ. ૫૯૫૮ પ્રતિ ક્વિન્ટલ

કેન્દ્રીય મંત્રી અશ્વિની વૈષ્ણવે માહિતી આપી હતી કે આ નવા ભાવથી દેશના ખેડૂતોને ૩૨.૪ મિલિયન મેટ્રિક ટન પાકની ખરીદી સામે કુલ રૂ. ૯૦,૯૬૨ કરોડ ચૂકવવામાં આવશે. આ નિર્ણયથી ઘઉંના ઉત્પાદન ખર્ચ પર ખેડૂતોને ૧૦૬% અને રાયડા પર ૯૬% સુધીનું નફાકારક માર્જિન મળશે, જે સરેરાશ ઉત્પાદન ખર્ચ કરતાં ૧.૫ ગણો ભાવ આપવાની નીતિને અનુસરે છે.

ગ્રીન એનર્જી કોરિડોર Phase-3: રૂ. ૧.૮૬ લાખ કરોડનું રોકાણ

ઊર્જા ક્ષેત્રે ક્રાંતિ લાવવા કેબિનેટે Green Energy Corridor Phase-III (GEC-III) ને મંજૂરી આપી છે. રૂ. ૧,૮૬,૪૦૫ કરોડના ખર્ચે સાકાર થનારી આ યોજના નાણાકીય વર્ષ ૨૦૩૨-૩૩ સુધીમાં પૂર્ણ થશે, જેમાં ૧૩૫ GW સુધીની પુનઃપ્રાપ્ય ઊર્જાને ગ્રીડ સાથે સાંકળવામાં આવશે. યોજના હેઠળ 50 GWh ક્ષમતાની 'બેટરી એનર્જી સ્ટોરેજ સિસ્ટમ' (BESS) સ્થાપવામાં આવશે, જે સોલાર ઉર્જા ઉપલબ્ધ ન હોય તેવા પીક અવર્સમાં વીજળી આપશે. કેન્દ્ર સરકાર આમાં રૂ. ૫૪,૦૮૨ કરોડની નાણાકીય સહાય આપશે, જેથી ગ્રાહકો માટે વીજળીના ભાવ નિયંત્રણમાં રહે.

દિલ્હીમાં ટ્રાફિક જામમાંથી મુક્તિ: રૂ. ૧,૭૯૦ કરોડની ITMS સિસ્ટમ

દિલ્હી અને આસપાસના વિસ્તારોમાં વાહનોના ધસારાને પહોંચી વળવા દિલ્હી પોલીસ દ્વારા ઇન્ટેલિજન્ટ ટ્રાફિક મેનેજમેન્ટ સિસ્ટમ (ITMS) ના અમલીકરણને મંજૂરી અપાઈ છે. રૂ. ૧,૭૮૯.૫૨ કરોડના ખર્ચે આગામી ૨૪ મહિનામાં દિલ્હીના ૪૨ પ્રમુખ કોરિડોરમાં આ પ્રોજેક્ટ ત્રણ તબક્કામાં લાગુ કરાશે. આ ટેક્નોલોજીથી રિયલ-ટાઇમ ટ્રાફિક ડેટા, ઓટોમેટિક સિગ્નલ્સ અને ટ્રાફિક નિયમભંગનું ડિજિટલ મોનિટરિંગ શક્ય બનશે, જેથી મેન્યુઅલ ટ્રાફિક વ્યવસ્થા પરની નિર્ભરતા ઘટશે.