નવી દિલ્હી:  વડાપ્રધાન નરેન્દ્ર મોદીએ મધ્ય પૂર્વના યુદ્ધ અને તેના કારણે તેલના ભાવમાં થતા ઉછાળાને ધ્યાનમાં રાખીને દેશવાસીઓને સાવચેતી રાખવા અપીલ કરી હતી. આ અપીલના તુરંત બાદ, નાણા મંત્રાલયે દેશની જાહેર ક્ષેત્રની બેંકો અને વીમા કંપનીઓ માટે એક વિશેષ એડવાઈઝરી જારી કરી છે. આ આદેશમાં સ્પષ્ટપણે જણાવાયું છે કે અધિકારીઓએ હવે બિનજરૂરી વિદેશ પ્રવાસ ટાળવો પડશે અને મીટિંગ્સ માટે વિડિયો કોન્ફરન્સિંગનો મહત્તમ ઉપયોગ કરવો પડશે. આ પગલું કોવિડ-19 ના સમયગાળાની યાદ અપાવે છે, જેમાં ખર્ચમાં મોટો ઘટાડો કરીને સરકારી તિજોરી પરનું ભારણ ઘટાડવાનો પ્રયાસ કરવામાં આવ્યો હતો.

નાણા મંત્રાલય દ્વારા સ્ટેટ બેંક ઓફ ઈન્ડિયા (SBI), બેંક ઓફ બરોડા (BoB) અને LIC જેવી દિગ્ગજ સંસ્થાઓને સૂચના આપવામાં આવી છે કે જ્યાં સુધી ભૌતિક હાજરી અનિવાર્ય ન હોય ત્યાં સુધી તમામ પ્રોજેક્ટ રિવ્યૂ અને મીટિંગ્સ વર્ચ્યુઅલ માધ્યમથી જ કરવી. એટલું જ નહીં, સરકારે સંસ્થાઓને તેમના પેટ્રોલ અને ડીઝલ વાહનોને બદલે ભાડાના ઇલેક્ટ્રિક વાહનો (EV) અપનાવવા માટે સમયમર્યાદા નક્કી કરવા જણાવ્યું છે. આ આદેશનો મુખ્ય હેતુ ભારત પર આયાતી ક્રૂડ ઓઈલની નિર્ભરતા ઘટાડવાનો અને વિદેશી મુદ્રા ભંડારને સુરક્ષિત રાખવાનો છે, જે હાલમાં હોર્મુઝ સ્ટ્રેટમાં ચાલી રહેલા તણાવને કારણે જોખમમાં મૂકાઈ શકે તેમ છે.

પીએમ મોદીએ માત્ર સરકારી તંત્ર જ નહીં, પણ સામાન્ય જનતાને પણ આ 'આર્થિક યુદ્ધ'માં સાથ આપવા વિનંતી કરી છે. વડાપ્રધાને મધ્યમ વર્ગના લોકોને અપીલ કરી છે કે તેઓ ઓછામાં ઓછું એક વર્ષ વિદેશ પ્રવાસ કરવાનું ટાળે અને સોનાની ખરીદી પર પણ સંયમ રાખે, જેથી વિદેશી હૂંડિયામણની બચત થઈ શકે. તેમણે ભારતમાં બનેલી ચીજવસ્તુઓ  ખરીદવા અને મેટ્રો શહેરોમાં જાહેર પરિવહનનો ઉપયોગ કરવા પર ભાર મૂક્યો છે. સરકારનું માનવું છે કે જો અધિકારીઓ અને સામાન્ય નાગરિકો સાથે મળીને આ શિસ્ત પાળશે, તો ભારત વૈશ્વિક અસ્થિરતા વચ્ચે પણ પોતાની અર્થવ્યવસ્થાને મજબૂત રાખી શકશે.