નાગપુર, તા.20: રાષ્ટ્રીય સ્વયંસેવક સંઘ (RSS) ની વાર્ષિક 'વિજયાદશમી' રેલીને સંબોધિત કરતા સંઘ પ્રમુખ મોહન ભાગવતે રાષ્ટ્રીય ગીત 'વંદે માતરમ્' ની મહત્વતા પર ભાર મૂકતા મોટું નિવેદન આપ્યું છે. તેમણે સ્પષ્ટ શબ્દોમાં જણાવ્યું હતું કે 'વંદે માતરમ્' એ સમગ્ર દેશની રાષ્ટ્રીય એકતા અને દેશભક્તિનું અમર પ્રતીક છે. તેથી આ રાષ્ટ્રીય ગીતને કોઈપણ પ્રકારના સંકોચ કે વાંધા વગર સંપૂર્ણ રીતે, ગર્વ સાથે અને મોટેથી ગાવામાં આવવું જોઈએ.

પોતાના સંબોધનમાં ઐતિહાસિક સંદર્ભ આપતા મોહન ભાગવતે યાદ અપાવ્યું હતું કે જ્યારે લોર્ડ કર્ઝને હિન્દુઓ અને મુસ્લિમો વચ્ચે સાંપ્રદાયિક ભેદભાવ ઊભો કરીને બંગાળના વિભાજનનો પ્રયાસ કર્યો હતો, ત્યારે સમગ્ર સમાજે આ ષડયંત્ર સામે એકજૂટ થઈને મક્કમ વિરોધ નોંધાવ્યો હતો. તે જ સમયગાળા દરમિયાન 'વંદે માતરમ્' એકતાના સૌથી મોટા હથિયાર તરીકે ઉભરી આવ્યું હતું અને આખરે બ્રિટિશ હકુમતને વિભાજનનો પ્રસ્તાવ પાછો ખેંચવાની ફરજ પડી હતી.

તેમણે આક્ષેપ કર્યો હતો કે દેશમાં ચાલતી 'તુષ્ટિકરણ'ની રાજનીતિ અને માનસિકતાએ વિભાજનકારી વિચારોને હવા આપી હતી, જેનો ખરાબ પરિણામ ૧૯૪૭માં દેશના ભાગલા તરીકે ભોગવવો પડ્યો હતો. વિભાજન દ્વારા જે સ્વાયત્તતા, સુખ અને શાંતિના વચનો આપવામાં આવ્યા હતા તે ક્યારેય પૂર્ણ થયા નથી, પરંતુ તેના બદલે સરહદો પર અને દેશની અંદર કાયમી અશાંતિ, અવિશ્વાસ અને સંઘર્ષની સ્થિતિ નિર્માણ પામી છે.

સંઘ પ્રમુખે ભારપૂર્વક જણાવ્યું હતું કે ભારત પ્રત્યે માતૃભૂમિ તરીકેની નિષ્ઠા, આપણા સહિયારા પૂર્વજો પ્રત્યેનો ગર્વ અને સનાતન ભારતીય સંસ્કૃતિના સાર્વત્રિક માનવીય મૂલ્યો જ રાષ્ટ્રને હંમેશાં એકતાના સૂત્રમાં બાંધી રાખે છે. તેમણે ઉમેર્યું કે હિન્દુ સમાજનો વિશ્વ પ્રત્યેનો દ્રષ્ટિકોણ હંમેશાં સર્વસમાવેશી રહ્યો છે અને આરએસએસ એક મજબૂત તેમજ સુવ્યવસ્થિત સમાજના નિર્માણ માટે સતત કાર્યરત છે.

પોતાના ભાષણ દરમિયાન તેમણે ભારતીય કોમર્શિયલ પાઈલટ કેપ્ટન સ્મિત મચ્છરની બહાદુરીની વિશેષ સરાહના કરી હતી. ઉલ્લેખનીય છે કે ગયા મહિને દુબઈથી તેલ અવીવ જઈ રહેલી ફ્લાયદુબઈની ફ્લાઈટ પર હવામાં થયેલા હુમલા દરમિયાન કેપ્ટન સ્મિતે પોતાની સૂઝબૂઝ અને વીરતાથી ૧૭૪ મુસાફરો અને ક્રૂ સભ્યોના જીવ બચાવ્યા હતા.

ભાગવતે અંતમાં જણાવ્યું હતું કે પેઢી દર પેઢી જળવાયેલા ભારતીય મૂલ્યો અને સંસ્કારો જ આપણા દેશના નાગરિકોને પોતાના જીવનું જોખમ ખેડીને પણ માનવતાની રક્ષા કરવાની પ્રેરણા આપે છે. રાષ્ટ્રીય હિતમાં તમામ નાગરિકોએ પોતાના મતભેદો ભૂલીને દેશની અખંડિતતા અને સદ્ભાવનાને વધુ મજબૂત બનાવવામાં પોતાનું યોગદાન આપવું જોઈએ.