મુંબઈ, તા.28: મહારાષ્ટ્ર પબ્લિક સર્વિસ કમિશન (MPSC) દ્વારા લેવાયેલી ડ્રગ ઇન્સ્પેક્ટર ભરતી પરીક્ષામાં પેપર લીક થવાના ગંભીર આરોપો બાદ રાજ્યના શૈક્ષણિક અને રાજકીય વર્તુળોમાં મોટો ખળભળાટ મચી ગયો છે. આ મામલે સણસણતા આરોપો લગાવનાર ફરિયાદી ઋષિકેશ ગાંગર્ડે (પાટીલ) ને મુંબઈ ક્રાઇમ બ્રાન્ચે સમન્સ પાઠવીને પૂછપરછ માટે બોલાવ્યા છે. ક્રાઇમ બ્રાન્ચે ગાંગર્ડેને તેમના દાવાઓને સમર્થન આપતા તમામ પુરાવાઓ સાથે હાજર રહેવા આદેશ આપ્યો હતો, જે બાદ તેઓ પોતાના વકીલ સાથે ક્રાઇમ બ્રાન્ચ સમક્ષ હાજર થયા છે અને હાલ તેમની ઊંડાણપૂર્વક પૂછપરછ ચાલી રહી છે.
૨૦ માર્ચે જ વોટ્સએપ ગ્રૂપ પર ફરતા થયા હતા ૯૦ પ્રશ્નો!
મળેલી વિગતો અનુસાર, MPSC હેઠળ ડ્રગ ઇન્સ્પેક્ટરની પરીક્ષા ૨૨ માર્ચે યોજાઈ હતી. જોકે, ફરિયાદીનો દાવો છે કે પરીક્ષાના બે દિવસ પહેલાં એટલે કે ૨૦ માર્ચે જ એક ચોક્કસ વોટ્સએપ ગ્રૂપ દ્વારા ઉમેદવારોને પરીક્ષાના પ્રશ્નો મોકલી આપવામાં આવ્યા હતા. કૌભાંડીઓએ આ ગ્રૂપ દ્વારા ૧૦૦ માંથી ૯૦ જેટલા પ્રશ્નો અગાઉથી જ ફરતા કરી દીધા હતા, જે સીધો મોટો ગુનો દર્શાવે છે. ઋષિકેશ ગાંગર્ડે આ મામલે MPSC ને ઈમેઈલ દ્વારા પણ લેખિત ફરિયાદ સબમિટ કરી હતી.
MPSC એ આરોપો ફગાવ્યા: "આ માત્ર પાયાવિહોણી અફવા"
બીજી તરફ, મહારાષ્ટ્ર પબ્લિક સર્વિસ કમિશન (MPSC) એ પેપર લીકના તમામ આરોપોને સખત શબ્દોમાં નકારી કાઢ્યા છે. કમિશને આ દાવાઓને પાયાવિહોણી અફવાઓ ગણાવ્યા છે અને પરીક્ષા સંપૂર્ણ પારદર્શક રીતે યોજાઈ હોવાનો દાવો કર્યો છે.
ક્રાઇમ બ્રાન્ચ સત્યતા ચકાસવામાં જોતરાઈ
MPSC ના ઇનકાર અને ફરિયાદીના ગંભીર દાવા વચ્ચે હવે મુંબઈ ક્રાઇમ બ્રાન્ચે મોરચો સંભાળ્યો છે. પોલીસ અધિકારીઓ ગાંગર્ડે દ્વારા રજૂ કરવામાં આવેલા ડિજિટલ અને અન્ય પુરાવાઓની તાંત્રિક તપાસ કરી રહ્યા છે. આ આરોપોમાં કેટલી સત્યતા છે અને ખરેખર કોઈ ગેરરીતિ કે મોટું રેકેટ કામ કરી રહ્યું છે કે કેમ, તે અંગેનો ખુલાસો ક્રાઇમ બ્રાન્ચની તપાસ પૂર્ણ થયા બાદ જ સામે આવશે.