તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
મુંબઈઃ ગાય પર પેટ્રોલ રેડી આગ લગાવી, ૧૫ બાઈક્સ સળગાવી દીધા! આરોપી પકડાયો
પોલીસે આરોપી વિરુદ્ધ ‘પ્રિવેન્શન ઓફ ક્રુઅલ્ટી ટુ એનિમલ્સ એક્ટ' અને અન્ય સંબંધિત કાયદાકીય જોગવાઈઓ હેઠળ કેસ નોંધ્યો
મુંબઈ,તા.૨: મુંબઈના સાકીનાકા વિસ્તારમાં એક સામાન્ય વિવાદ બાદ આગ લગાડવાની ઘટના સામે આવી છે. આરોપ છે કે એક વ્યક્તિએ ગાયના મોઢા પર પેટ્રોલ રેડીને તેને સળગાવી દીધી હતી. ત્યારબાદ, તેણે તે વિસ્તારમાં પાર્ક કરેલા ૧૫ બાઈક્સ, વીજળીના મીટરો અને કેટલીક દુકાનોને પણ આગ લગાવી દીધી હતી. સાકીનાકા પોલીસે આ કેસના સંબંધમાં બુધવારે આરોપી આકાશ યાદવની ધરપકડ કરી છે.
પોલીસના જણાવ્યા અનુસાર, આ ઘટના પાછળ અગાઉ થયેલો કોઈ વિવાદ હોવાની શંકા છે. અહેવાલ મુજબ, બે દિવસ પહેલા વિજય યાદવ નામના સ્થાનિક રહેવાસીએ આકાશને પાર્ક કરેલી કેટલીક મોટરસાયકલો પાડી દેતા જોયો હતો. જ્યારે વિજયે તેને આ અંગે પૂછપરછ કરી, ત્યારે તેમની વચ્ચે બોલાચાલી થઈ હતી. આ દરમિયાન આકાશે વિજયને ગાળો આપી હતી અને ધમકી પણ આપી હતી. પોલીસને શંકા છે કે આ વિવાદના કારણે જ આરોપીએ ગાય અને વાહનોને નિશાન બનાવ્યા હશે.
આ ઘટના સવારે લગભગ ૫:૩૦ વાગ્યે પ્રકાશમાં આવી. વિજય અને તેનો નાનો ભાઈ તેમના પશુઓના તબેલા પાસેના એક રૂમમાં સૂતા હતા, ત્યારે તેમણે ગાયોના બેચેનીભર્યા અવાજો સાંભળ્યા. બહાર આવીને તપાસ કરતા તેમને જાણ થઈ કે એક ગાયના મોઢાને સળગાવી દેવામાં આવ્યું છે. વિજયના ભાઈએ આગ ઓલવી નાખી, પરંતુ ત્યાં સુધીમાં ગાય દાઝી ગઈ હતી. આ ગાય વિજયના તબેલામાં રાખવામાં આવેલી આઠ ગાયોમાંથી એક હતી. બાદમાં પરિવારને જાણ થઈ કે ખૈરાની રોડ પર આવેલા ચૌધરી એસ્ટેટ સંકુલમાં પણ આગ લાગી છે. આ આગમાં અનેક બાઈક્સ વાહનો, વીજળીના મીટરો અને ત્રણથી ચાર વ્યાપારી દુકાનોના કેટલાક ભાગોને નુકસાન થયું હતું. પરિવારે આગ ઓલવવાનો પ્રયાસ કર્યો અને ફાયર વિભાગ તથા પોલીસને જાણ કરી. ફાયર બ્રિગેડના જવાનો ઘટનાસ્થળે પહોંચ્યા અને આગને કાબૂમાં લીધી.
પોલીસના જણાવ્યા અનુસાર, વિસ્તારના સીસીટીવી ફૂટેજમાં આકાશ યાદવ સવારે ૫ થી ૬ વાગ્યાની વચ્ચે હાથમાં બોટલમાં પેટ્રોલ લઈને ફરતો જોવા મળે છે. આ ફૂટેજના આધારે પોલીસે તેની ઓળખ કરી અને થોડા કલાકો બાદ તેની ધરપકડ કરી લીધી. એવું પણ જાણવા મળ્યું છે કે ઘટના સમયે આરોપી દારૂના નશામાં હતો. એક પોલીસ અધિકારીએ જણાવ્યું, સીસીટીવી ફૂટેજના આધારે યાદવને કસ્ટડીમાં લેવામાં આવ્યો છે. તેના પર ગાયના મોઢામાં પેટ્રોલ રેડીને તેને સળગાવી દેવાનો આરોપ છે. ત્યારબાદ, તેણે ચૌધરી એસ્ટેટ કમ્પાઉન્ડ અને યાદવ નગરમાં આગ લગાવી દીધી હતી, જેના કારણે મોટરસાયકલો, વીજળીના મીટરો અને વ્યાપારી દુકાનોને નુકસાન થયું હતું.
‘પ્રિવેન્શન ઓફ ક્રુઅલ્ટી ટુ એનિમલ્સ ઍક્ટ‘ (પ્રાણીઓ પ્રત્યે ક્રૂરતા નિવારણ અધિનિયમ) હેઠળ કેસ નોંધાયો
પોલીસે આરોપી વિરુદ્ધ ‘પ્રિવેન્શન ઓફ ક્રુઅલ્ટી ટુ એનિમલ્સ ઍક્ટ‘ અને અન્ય સંબંધિત કાયદાકીય જોગવાઈઓ હેઠળ કેસ નોંધ્યો છે. અધિકારીઓના જણાવ્યા અનુસાર, આકાશ યાદવ બેરોજગાર છે અને આ વિસ્તારમાં અગાઉ પણ જાહેર વ્યવસ્થામાં ખલેલ પહોંચાડવાના અનેક કેસોમાં તેનું નામ સામે આવ્યું છે. સાકીનાકા પોલીસના વરિષ્ઠ નિરીક્ષક અવિનાશ મંડલેએ ધરપકડની પુષ્ટિ કરી છે. પોલીસ આ મામલે વધુ તપાસ કરી રહી છે.
(10:19 AM IST)
છેલ્લા 8 દિવસમાં સૌથી લોકપ્રિય 
