મુંબઈ: મુંબઈમાં આકરા ઉનાળાની સાથે હવે પાણીની તીવ્ર અછતનો સામનો કરવાનો સમય આવી ગયો છે. બૃહન્મુંબઈ મ્યુનિસિપલ કોર્પોરેશન (BMC) એ સોમવારે સત્તાવાર જાહેરાત કરી છે કે આગામી ૧૫ મે થી સમગ્ર મુંબઈ મહાનગરમાં ૧૦ ટકા પાણી કાપ લાદવામાં આવશે. જળાશયોમાં પાણીનું સ્તર ભયજનક રીતે ઘટી રહ્યું હોવાથી સાવચેતીના ભાગરૂપે આ નિર્ણય લેવામાં આવ્યો છે. માત્ર મુંબઈ જ નહીં, પરંતુ BMC જે વિસ્તારોમાં પાણી પૂરું પાડે છે તેવા થાણે અને ભિવંડીના રહીશોને પણ આ કાપનો સામનો કરવો પડશે.

કેમ લેવો પડ્યો આ કઠોર નિર્ણય?

BMC ના જણાવ્યા અનુસાર, મુંબઈને પાણી પૂરું પાડતા સાત મુખ્ય જળાશયોમાં હાલમાં માત્ર ૨૩.૫૨ ટકા જ પાણીનો સ્ટોક બચ્યો છે. સામાન્ય રીતે વાર્ષિક જરૂરિયાત ૧૪.૪૭ લાખ મિલિયન લિટરની હોય છે, જેની સામે અત્યારે માત્ર ૩.૪૦ લાખ મિલિયન લિટર પાણી ઉપલબ્ધ છે. વધતા તાપમાનને કારણે બાષ્પીભવનનો દર વધ્યો છે અને ઉપરથી ભારતીય હવામાન વિભાગે ‘અલ નીનો’ની અસરને કારણે આ વર્ષે ઓછો વરસાદ પડવાની આગાહી કરી છે. આ પરિસ્થિતિને પહોંચી વળવા માટે ચોમાસું બેસે ત્યાં સુધી પાણી બચાવવું અનિવાર્ય બન્યું છે.

અનામત સ્ટોકનો આશરો

પરિસ્થિતિ ગંભીર હોવા છતાં પાલિકાએ નાગરિકોને ગભરાવાની મનાઈ કરી છે. મુંબઈની તરસ છિપાવવા માટે ભાત્સા ડેમમાંથી ૧.૪૭ લાખ મિલિયન લિટર અને અપર વૈતરણા ડેમમાંથી ૯૦,૦૦૦ મિલિયન લિટર વધારાનું અનામત પાણી વાપરવાની મંજૂરી મેળવવામાં આવી છે. પાલિકા પ્રશાસન દરરોજ પાણીના જથ્થા પર નજર રાખી રહ્યું છે જેથી કરીને લોકોને પૂરતું પાણી મળી રહે.

નાગરિકોને ખાસ અપીલ

BMC એ મુંબઈના તમામ નાગરિકોને પાણીનો કરકસરપૂર્વક ઉપયોગ કરવા અને બગાડ અટકાવવા વિનંતી કરી છે. જ્યાં સુધી જળાશયોમાં પાણીનો સંતોષકારક જથ્થો જમા નહીં થાય, ત્યાં સુધી આ કાપ અમલમાં રહેશે. ગાડીઓ ધોવા કે બિનજરૂરી પાણી વહાવવાને બદલે રોજિંદા જીવનમાં પાણી બચાવવાની પદ્ધતિઓ અપનાવવી હવે દરેક મુંબઈગરાની જવાબદારી બની ગઈ છે.