મુંબઈ, તા.10: દક્ષિણ મુંબઈની પ્રતિષ્ઠિત સૈફી હોસ્પિટલ અને તેની પ્રથમ વર્ષની જનરલ સર્જરી તાલીમાર્થી ડોક્ટર વચ્ચેનો વિવાદ હવે બોમ્બે હાઈકોર્ટના દરવાજે પહોંચ્યો છે. હોસ્પિટલ ટ્રસ્ટે પોતાની વૈશ્વિક પ્રતિષ્ઠાને નુકસાન પહોંચાડવાનો આરોપ મૂકીને તાલીમાર્થી ડોક્ટર આસિયા ખાન લુકમાન સામે ₹125 કરોડનો જંગી માનહાનિનો દાવો ઠોકી દીધો છે. 

રેગિંગ, ત્રાસ અને ગેરકાયદે કામના કલાકોના ગંભીર આરોપો

મળતી માહિતી મુજબ, ફેબ્રુઆરીમાં DNB જનરલ સર્જરી તાલીમાર્થી તરીકે જોડાયેલી આસિયા ખાન લુકમાને સોશિયલ મીડિયા પર વાયરલ પોસ્ટ્સ કરીને હોસ્પિટલ પર ચોંકાવનારા આરોપો લગાવ્યા હતા. તેણે દાવો કર્યો હતો કે હોસ્પિટલ પ્રશાસન અને વરિષ્ઠ ડોક્ટરો દ્વારા તાલીમાર્થીઓને ગેરકાયદેસર કલાકો સુધી કામ કરાવીને માનસિક ત્રાસ, પજવણી અને રેગિંગનો શિકાર બનાવવામાં આવે છે. 

હોસ્પિટલનો પલટવાર: ગેરવર્તણૂક છુપાવવા રચાયેલું નાટક

હોસ્પિટલ ટ્રસ્ટે આ તમામ આરોપોને પાયાવિહોણા અને મનોગડંત ગણાવ્યા છે. હોસ્પિટલનું કહેવું છે કે લુકમાન માર્ચથી મે મહિના દરમિયાન અનધિકૃત રીતે ગેરહાજર રહી હતી અને દર્દીઓની સારવાર પ્રત્યે ઉદાસીન વલણ દાખવતી હતી. હોસ્પિટલના મેડિકલ ડિરેક્ટર સમક્ષ રવિવારની રજા માંગ્યા બાદ, નિયમ મુજબ ૨૪ કલાક કટોકટી સેવાઓ ચાલુ હોવાથી વિનંતી ફગાવી દેવાતા જ તેણે બદનક્ષીભરી પોસ્ટ્સ કરવાનું શરૂ કર્યું હતું. પોતાના ગેરવર્તણૂક અને કામચોરી પરથી ધ્યાન હટાવવા જ તેણે આ ડ્રામા રચ્યો હોવાનો દાવો કરીને તેને સસ્પેન્ડ પણ કરી દેવામાં આવી છે. 

અભિવ્યક્તિની સ્વતંત્રતા કે બદનક્ષી? વિવાદ ગરમાયો

બીજી તરફ, લુકમાનના વકીલે કોર્ટમાં બચાવ કરતા જણાવ્યું કે અતિશય કામના કલાકો અને પજવણી સામે સક્ષમ અધિકારીઓ સમક્ષ અવાજ ઉઠાવવો એ બદનક્ષી નથી પરંતુ બંધારણીય રીતે સુરક્ષિત અભિવ્યક્તિની સ્વતંત્રતાનો અધિકાર છે. લુકમાન માત્ર ગૌરવ સાથે પોતાનો અભ્યાસ પૂર્ણ કરવા માંગે છે. હાલમાં હાઈકોર્ટની સિંગલ-જજ બેન્ચે લુકમાનને હોસ્પિટલ સંબંધિત વધુ કોઈ પણ સામગ્રી સોશિયલ મીડિયા પર પોસ્ટ કરવા સામે સખત મનાઈહુકમ ફરમાવી દીધો છે.