હિંગોલી તા ૨૫:મુંબઈ-હિંગોલી હાઇવે પર મોડી રાત્રે ખૂની હુમલાની ઘટના સામે આવી છે. અજાણ્યા શખ્સોએ રાત્રે લગભગ 2 વાગ્યે એક કારને રોકીને આડેધડ પથ્થરમારો કર્યો હતો અને ડ્રાઇવરને લોખંડના સળિયાથી માર મારીને લોહીલુહાણ કરી દીધો હતો.

મળતી માહિતી મુજબ, મુંબઈથી હિંગોલી તરફ જઈ રહેલી એક ખાનગી કારને હાઇવેના સૂમસામ વિસ્તારમાં 4 થી 5 અજાણ્યા શખ્સોએ રોકી હતી. કાર રોકાતા જ આરોપીઓએ કાર પર પથ્થરમારો શરૂ કરી દીધો હતો. કાચ તોડીને આરોપીઓએ ડ્રાઇવરને બહાર ખેંચીને લોખંડના સળિયાથી બેરહેમીથી માર માર્યો હતો.

હુમલામાં ડ્રાઇવરને માથાના ભાગે ગંભીર ઇજાઓ પહોંચી છે. આરોપીઓએ કારમાં રહેલા સામાનની લૂંટ ચલાવવાનો પ્રયાસ પણ કર્યો હતો. દરમિયાન અન્ય વાહનો આવી જતા હુમલાખોરો ત્યાંથી ફરાર થઈ ગયા હતા.

ઘટનાની જાણ થતા પોલીસ તાત્કાલિક સ્થળ પર પહોંચી હતી અને ઘાયલ ડ્રાઇવરને હિંગોલીની સરકારી હોસ્પિટલમાં દાખલ કર્યો હતો. પ્રાથમિક તપાસમાં લૂંટના ઇરાદે હુમલો થયો હોવાની આશંકા સેવાઈ રહી છે. પોલીસે અજાણ્યા આરોપીઓ વિરુદ્ધ ગુનો નોંધીને આસપાસના CCTV ફૂટેજના આધારે તપાસ હાથ ધરી છે. રાત્રે હાઇવે પર મુસાફરી કરતા વાહનચાલકોમાં આ ઘટનાને પગલે ભયનો માહોલ ફેલાયો છે.