વાશિંગ્ટન : બ્રહ્માંડના દૂરના ખૂણેથી કોઈ આપણો સંપર્ક કરવાનો પ્રયાસ કરી રહ્યું છે કે શું તે અંગે વૈજ્ઞાનિકો દ્વારા અવકાશના ઊંડાણમાંથી રહસ્યમય રેડિયો સિગ્નલો શોધી કાઢવામાં આવ્યા છે, જેનાથી ખગોળશાસ્ત્રીઓ પણ આશ્ચર્યચકિત થઈ ગયા છે. પૃથ્વીથી લગભગ ૬૩ પ્રકાશ-વર્ષ દૂર આવેલા અને ૨૦૦૮માં શોધાયેલા "બીટા પિક્ટોરિસ બી" નામના આ વિશાળ ગ્રહ પરથી વિચિત્ર અવાજો ઉત્સર્જિત થઈ રહ્યા છે, જે આપણા સૌરમંડળના સૌથી મોટા ગ્રહ ગુરુ કરતા લગભગ ૧૧ ગણા ભારે છે અને તેને તેના સૂર્યની પરિક્રમા કરવામાં આશરે ૨૩.૬ વર્ષ લાગે છે.

આ રહસ્ય ઉકેલવા માટે વૈજ્ઞાનિકો દક્ષિણ આફ્રિકાના અત્યંત શક્તિશાળી મીરકેટ ટેલિસ્કોપ એરે તરફ વળ્યા હતા, જેની તીવ્ર દ્રષ્ટિએ જાણવા મળ્યું કે આ અવાજો કોઈ તારામાંથી નહીં પરંતુ સીધા આ ગ્રહમાંથી જ આવી રહ્યા છે. જોકે, વૈજ્ઞાનિકોએ સ્પષ્ટ કર્યું છે કે આ કોઈ એલિયન્સનો સંદેશ નથી, પરંતુ પૃથ્વીના ધ્રુવો પર જોવા મળતી ઓરોરાસ જેવી જ એક વિશાળ કુદરતી ઘટના છે જે આ ગ્રહ પર બની રહી છે.

આ ગ્રહનું શક્તિશાળી ચુંબકીય ક્ષેત્ર અવકાશમાંથી ચાર્જ થયેલા કણોને આકર્ષે છે અને તેની ધરી પર માત્ર આઠથી નવ કલાકના અવિશ્વસનીય ઝડપી પરિભ્રમણને કારણે જબરદસ્ત વિદ્યુત તરંગો ઉત્પન્ન થાય છે, જે રેડિયો સિગ્નલો તરીકે અવકાશમાં પ્રસારિત થાય છે.

અગાઉ પણ ખગોળશાસ્ત્રીઓ દ્વારા આવા બ્રહ્માંડના અજાણ્યા સિગ્નલોનું નિરીક્ષણ કરવામાં આવતું રહ્યું છે, અને હવે આ ટેક્નોલોજીની મદદથી ભવિષ્યમાં અન્ય ગ્રહો પર ચુંબકીય ક્ષેત્ર અને હવામાનની સ્થિતિનો અભ્યાસ વધુ સચોટ રીતે કરવામાં આવશે.