મુંબઈ : પશ્ચિમ રેલવેના નાયગાંવ રેલવે સ્ટેશને ગત ૪ નવેમ્બરની સાંજે એક ૨૦ વર્ષીય યુવતી સાથે છેડતી કર્યા બાદ તેનો વિરોધ કરવા પર તેને ચાલુ ટ્રેન નીચે ધકેલી દેવાની અત્યંત ગંભીર અને હચમચાવી નાખતી ઘટના સામે આવી છે, જેમાં યુવતીએ પોતાનો ડાબો હાથ ગુમાવવો પડ્યો છે.

પ્રાપ્ત વિગતો અનુસાર, બોરીવલીથી નાયગાંવ તરફ જતી લોકલ ટ્રેનમાં મુસાફરી કરી રહેલી પીડિત યુવતી સાથે એક અજાણ્યા શખસે અડપલાં કર્યા હતા, અને સ્ટેશને ઉતર્યા બાદ જ્યારે યુવતીએ તેનો વિરોધ કરીને ચપ્પલથી માર માર્યો ત્યારે ઉશ્કેરાયેલા નરાધમે તેને રેલવે ટ્રેક પર ધક્કો મારી દીધો હતો.

ટ્રેનના વ્હિલ નીચે આવી જવાને કારણે યુવતીની કોણી અને નીચેનો ભાગ કપાઈ ગયો હતો તેમજ માથામાં ગંભીર ઈજા થવાને કારણે તેને ૧૬ ટાંકા આવ્યા હતા, અને શરૂઆતમાં આ ઘટનાને અકસ્માત માનવામાં આવતી હતી પરંતુ હોસ્પિટલમાં આપેલા નિવેદનને કારણે સાચું સત્ય બહાર આવ્યું હતું.

ઘટનાની ગંભીરતાને જોતા સરકારી રેલવે પોલીસ (જીઆરપી) અને રેલવે પ્રોટેક્શન ફોર્સ (આરપીએફ) ની સંયુક્ત ટીમે ત્વરિત કાર્યવાહી કરીને ૯ નવેમ્બરના રોજ જિતેન્દ્ર ગિરજપ્પા હિર્મુખે નામના આરોપીની ધરપકડ કરી લીધી છે અને તેના વિરુદ્ધ ભારતીય ન્યાય સંહિતાની કલમ ૧૦૯ (હત્યાનો પ્રયાસ) સહિતની કલમો ઉમેરી છે.

આ ઘટનાને પગલે મુંબઈ સબર્બન રેલવેમાં મહિલાઓની સુરક્ષાને લઈને ગંભીર સવાલો ઊભા થયા છે અને મહારાષ્ટ્ર નવનિર્માણ સેના સહિતના પદાધિકારીઓએ રેલવે પોલીસ અધિકારીઓની મુલાકાત લઈને આરોપી સામે ફાસ્ટ ટ્રક કોર્ટમાં કેસ ચલાવી કઠોરતમ સજા કરવાની માંગ કરી છે.

પીડિત યુવતી અને તેના પરિવાર દ્વારા ન્યાયની ગુહાર લગાવવામાં આવી રહી છે, ત્યારે પોલીસ દ્વારા આ કેસમાં વધુ કાનૂની પૂરાવાઓ એકત્રિત કરીને આરોપીને કડકમાં કડક સજા અપાવવા માટે આગળની તપાસ ત્વરિત ગતિએ ચલાવવામાં આવી રહી છે.