​નવી દિલ્હી: ​દેશના લાખો વાહનચાલકો માટે જુલાઈ મહિનાનો પ્રથમ દિવસ ખુશીના સમાચાર લઈને આવ્યો છે. ખાનગી ક્ષેત્રની દિગ્ગજ ઈંધણ રિટેલર કંપની ‘નાયરા એનર્જી’એ પેટ્રોલ અને ડીઝલના ભાવમાં મોટો ઘટાડો કરવાની જાહેરાત કરી છે. કંપનીએ પેટ્રોલના ભાવમાં પ્રતિ લિટર ૫ રૂપિયા અને ડીઝલના ભાવમાં પ્રતિ લિટર ૩ રૂપિયાનો ઘટાડો કર્યો છે. છેલ્લા બે વર્ષ કરતાં વધુ સમયગાળામાં રિટેલ ઈંધણના ભાવમાં કોઈ કંપની દ્વારા કરવામાં આવેલો આ પ્રથમ મોટો ઘટાડો છે, જેનાથી સામાન્ય નાગરિકોને મોટી રાહત મળી છે.

​વૈશ્વિક સ્થિતિમાં સુધારાની સીધી અસર

છેલ્લા કેટલાક સમયથી પશ્ચિમ એશિયા (મિડલ ઈસ્ટ)માં ચાલી રહેલા તણાવ અને હોર્મુઝની સામુદ્રધુનીમાં સર્જાયેલી અસ્થિરતાને કારણે કાચા તેલના (Crude Oil) ભાવમાં મોટો ઉછાળો જોવા મળ્યો હતો. જોકે, હવે આ પ્રદેશમાં તણાવમાં ઘટાડો થતા અને મુખ્ય દરિયાઈ માર્ગો ફરી ખુલતા ક્રૂડ ઓઈલ અને એલએનજીનો પુરવઠો સુધર્યો છે. આંતરરાષ્ટ્રીય બજારમાં કાચા તેલના ભાવ નરમ પડતા તેનો સીધો લાભ ગ્રાહકો સુધી પહોંચાડવા માટે નાયરા એનર્જીએ આ ભાવકપાતનો નિર્ણય લીધો છે. નોંધનીય છે કે, માર્ચ મહિનામાં જ્યારે વૈશ્વિક તણાવને કારણે ભાવ વધ્યા હતા, ત્યારે કંપનીએ જે વધારો કર્યો હતો, તે હવે પૂરેપૂરો પાછો ખેંચી લીધો છે.

​૭,૦૦૦થી વધુ પંપ પર નવા ભાવ લાગુ

નાયરા એનર્જીના દેશભરમાં ફેલાયેલા ૭,૦૦૦થી વધુ પેટ્રોલ પંપ પર આ નવા દરો ૧ જુલાઈ, ૨૦૨૬થી તાત્કાલિક અસરથી અમલમાં આવી ગયા છે. કંપની ગુજરાતના વાડીનારમાં ૨૦ મિલિયન ટનની વાર્ષિક ક્ષમતા ધરાવતી મોટી રિફાઈનરી ધરાવે છે, જે ઈંધણના સપ્લાયમાં મુખ્ય ભૂમિકા ભજવે છે. જોકે, ગ્રાહકોએ એ નોંધવું જરૂરી છે કે, વિવિધ રાજ્યોમાં વસૂલવામાં આવતા વેટ (VAT) અને અન્ય સ્થાનિક કરના માળખાને કારણે અંતિમ છૂટક કિંમતોમાં શહેર અને રાજ્ય મુજબ થોડો તફાવત હોઈ શકે છે.

​સરકારી કંપનીઓના ભાવ યથાવત

એક તરફ નાયરા એનર્જીએ ઈંધણના ભાવ ઘટાડીને ગ્રાહકોને રાહત આપી છે, તો બીજી તરફ ઇન્ડિયન ઓઇલ (IOC), ભારત પેટ્રોલિયમ (BPCL) અને હિન્દુસ્તાન પેટ્રોલિયમ (HPCL) જેવી સરકારી તેલ કંપનીઓએ હાલના તબક્કે પેટ્રોલ-ડીઝલના ભાવમાં કોઈ પણ પ્રકારનો ફેરફાર કર્યો નથી. આ સરકારી કંપનીઓ દેશના ૯૦ ટકાથી વધુ પેટ્રોલ પંપનું સંચાલન કરે છે, જ્યાં હાલના જૂના ભાવ જ ચાલુ રહેશે. રાજધાની દિલ્હીમાં ઇન્ડિયન ઓઇલના પંપ પર પેટ્રોલ ૧૦૨.૧૨ રૂપિયા અને ડીઝલ ૯૫.૨૦ રૂપિયા પ્રતિ લિટરના જૂના ભાવે જ વેચાઈ રહ્યું છે. બજારના નિષ્ણાતો માની રહ્યા છે કે જો વૈશ્વિક સ્તરે કાચા તેલના ભાવ આ જ રીતે નીચા સ્તરે સ્થિર રહેશે, તો આગામી સમયમાં સરકારી કંપનીઓ પણ ભાવ ઘટાડા અંગે વિચારણા કરી શકે છે.