કોલકાતા, તા.૦૫: પશ્ચિમ બંગાળના રાજકારણમાં જો કોઈ એક વ્યક્તિએ મમતા બેનર્જીના અજેય ગઢમાં ગાબડું પાડ્યું હોય, તો તે નામ છે સુવેન્દુ અધિકારી. ૧૯૮૯માં એક સાધારણ વિદ્યાર્થી નેતા તરીકે કારકિર્દી શરૂ કરનાર સુવેન્દુ આજે બંગાળ ભાજપનો સૌથી મોટો ચહેરો બની ગયા છે. તેમની રણનીતિ અને જમીની પકડને કારણે જ આજે ભાજપ બંગાળમાં ઐતિહાસિક બહુમતી તરફ આગળ વધી રહ્યું છે.
રાજકારણના પાઠ ગળથૂથીમાં મળ્યા
૧૫ ડિસેમ્બર ૧૯૭૦ના રોજ પૂર્વ મેદિનીપુરના કોન્ટાઈ ખાતે જન્મેલા સુવેન્દુને રાજકારણ વારસામાં મળ્યું છે. તેમના પિતા શિશિર અધિકારી દિગ્ગજ નેતા હતા. સુવેન્દુએ ૧૯ વર્ષની ઉંમરે કોંગ્રેસની વિદ્યાર્થી પાંખથી શરૂઆત કરી હતી. ૧૯૯૮માં જ્યારે મમતા બેનર્જીએ TMC બનાવી, ત્યારે સુવેન્દુ તેમના પડખે ઉભા રહ્યા અને બંગાળના ખૂણે ખૂણે પક્ષને મજબૂત કર્યો.
નંદીગ્રામ આંદોલન: જ્યારે સુવેન્દુ ખેડૂતોની 'ઢાલ' બન્યા
સુવેન્દુ અધિકારીના જીવનનો સૌથી મોટો વળાંક ૨૦૦૭નું નંદીગ્રામ આંદોલન હતું. જ્યારે ડાબેરી સરકાર ખેડૂતોની જમીન છીનવી રહી હતી, ત્યારે સુવેન્દુએ 'ભૂમિ ઉચ્ચેદ પ્રતિરોધ સમિતિ' બનાવીને રસ્તા પર ઉતરી લડત આપી હતી. ૧૪ માર્ચ ૨૦૦૭ના તે ભયાનક પોલીસ ગોળીબાર છતાં સુવેન્દુ હિંમત હાર્યા વગર ગામડાઓમાં ફરતા રહ્યા. આ આંદોલને જ ૨૦૧૧માં ૩૪ વર્ષ જૂના ડાબેરી શાસનનો અંત આણ્યો હતો.
ગુરુ સામે જ જંગ અને ઐતિહાસિક વિજય
વર્ષ ૨૦૨૦માં જ્યારે તેમને લાગ્યું કે TMC માં લોકશાહી નથી, ત્યારે તેમણે મોટો નિર્ણય લેતા ભાજપનો હાથ પકડ્યો. ૨૦૨૧ની વિધાનસભા ચૂંટણીમાં તેમણે સાબિત કરી દીધું કે તેઓ 'કિંગમેકર' જ નહીં પણ 'કિંગ' પણ છે. તેમણે નંદીગ્રામમાં ખુદ મમતા બેનર્જીને પરાજય આપીને આખા દેશને ચોંકાવી દીધો હતો. ત્યારથી તેઓ વિપક્ષના નેતા તરીકે મમતા સરકાર સામે સતત પડકાર ફેંકી રહ્યા છે.
અપરિણીત અને સમર્પિત જીવન
૫૩ વર્ષીય સુવેન્દુ અધિકારી આજે પણ અપરિણીત છે અને તેમનું આખું જીવન બંગાળની જનતા માટે સમર્પિત કર્યું છે. સંદેશખલી હોય કે અન્ય ભ્રષ્ટાચારના મુદ્દા, સુવેન્દુએ હંમેશા આક્રમક તેવર બતાવ્યા છે. આજે જ્યારે બંગાળમાં ભાજપ સરકાર બનાવવા જઈ રહ્યું છે, ત્યારે લોકોમાં એક જ ચર્ચા છે - શું નંદીગ્રામનો આ નાયક હવે બંગાળના મુખ્યમંત્રી તરીકે શપથ લેશે?