નવી દિલ્હી : વડાપ્રધાન નરેન્દ્રભાઈ મોદીએ શનિવારે દિલ્હી યુનિવર્સિટીની પ્રતિષ્ઠિત શ્રીરામ કોલેજ ઓફ કોમર્સ એટલે કે એસઆરસીસીના શતાબ્દી સમારોહમાં સામેલ થવા માટે અનોખી પહેલ કરી અને રસ્તાના બદલે દિલ્હી મેટ્રોમાં બેસીને મુસાફરી કરી હતી. મેટ્રો પ્રવાસ દરમિયાન તેમણે ટ્રેનમાં હાજર રહેલા નાના બાળકો અને યુવા વિદ્યાર્થીઓ સાથે હસમુખા સ્વભાવે વાતચીત કરી હતી, જેનો આ વીડિયો અને કિસ્સો સોશિયલ મીડિયા પર ભારે ચર્ચાનો વિષય બન્યો છે. કોલેજ પહોંચ્યા બાદ તેમનું ઉષ્માભર્યું સ્વાગત કરવામાં આવ્યું હતું અને તેમણે સંસ્થાના શતાબ્દી વર્ષ નિમિત્તે વિશેષ શતાબ્દી પુસ્તકનું વિમોચન પણ કર્યું હતું.

પોતાના પ્રેરણાદાયી સંબોધનમાં વડાપ્રધાન નરેન્દ્રભાઈ મોદીએ એસઆરસીસીની આગવી ઓળખ અને તેના લાંબા શૈક્ષણિક ઇતિહાસ વિશે વિસ્તારથી ચર્ચા કરી હતી. તેમણે જણાવ્યું હતું કે દિલ્હી યુનિવર્સિટીમાં આજની તારીખમાં પણ જ્યારે કોઈને પૂછવામાં આવે કે તમે કઈ કોલેજમાંથી છો અને જવાબમાં જ્યારે એસઆરસીસી કહેવામાં આવે છે, ત્યારે તે પોતાનામાં એક પ્રકારનો ગર્વ અને ફ્લેક્સ બની જાય છે. તેમણે ઉમેર્યું હતું કે આ શતાબ્દી મહોત્સવ માત્ર એક શૈક્ષણિક સંસ્થા માટે જ નહીં, પરંતુ સમગ્ર દેશના શિક્ષણ ક્ષેત્ર માટે અત્યંત ગૌરવવંતી ક્ષણ છે જ્યાં અનેક પેઢીઓ એકસાથે ભેગી થઈ છે.

કોલેજમાંથી અભ્યાસ કરીને બહાર નીકળેલા પૂર્વ વિદ્યાર્થીઓની પ્રશંસા કરતા વડાપ્રધાન નરેન્દ્રભાઈ મોદીએ તેમને ઓજી તરીકે સંબોધિત કર્યા હતા અને કહ્યું કે આ તમામ લોકોએ વૈશ્વિક સ્તરે કોલેજનું નામ રોશન કર્યું છે. તેમણે પોતાના જૂના મિત્ર અને દિવંગત નેતા અરુણ જેટલીને યાદ કરતા જણાવ્યું કે તેમની સાથેની મુલાકાતોમાં એસઆરસીસીના દિવસોના કિસ્સાઓ ચોક્કસ આવતા અને તેઓ ઘણીવાર એક જ વાતો ખૂબ જ રસપૂર્વક વારંવાર જણાવતા હતા. આ ઉપરાંત તેમણે પોતાની સાથે કાર્યરત સંજીવ સાન્યાલ પણ આ જ કોલેજમાંથી ભણેલા હોવાનો ઉલ્લેખ કરીને સંસ્થાની પ્રતિભાને બિરદાવી હતી.

વડાપ્રધાન નરેન્દ્રભાઈ મોદીએ એ વાત પર પણ ભાર મૂક્યો હતો કે આ કોલેજે માત્ર અર્થશાસ્ત્રના ક્ષેત્રમાં જ નહીં, પરંતુ રાજકારણ, કળા, કાયદો અને ન્યાયતંત્ર સહિતના વિવિધ ક્ષેત્રોમાં અદ્ભુત પ્રતિભાઓ દેશને આપી છે. પોતાના અંદાજમાં તેમણે કહ્યું કે ભલે કોઈ પરંપરાગત અર્થમાં બહુ મોટો ધુરંધર ન હોય, પરંતુ અહીંના વિદ્યાર્થીઓએ દરેક જગ્યાએ પોતાની એક અલગ ધૂમ મચાવી છે. તેમણે પોતાના વર્ષ 2013ના ભાષણનો પણ ઉલ્લેખ કર્યો અને કહ્યું કે તે સમયનું ભાષણ આજે પણ લોકોના દિલમાં તાજું છે અને નવી પેઢીએ પણ તેને ખૂબ આવકાર્યું છે.