ભારતમાં વધી રહેલા ઈંધણના વપરાશ અને ટ્રાફિકની સમસ્યાને ઘટાડવા માટે નેસેન્ટ ઇન્ફોર્મેશન ટેકનોલોજી એમ્પ્લોઇઝ સેનેટ દ્વારા કેન્દ્ર સરકારને એક મહત્વપૂર્ણ પ્રસ્તાવ મોકલવામાં આવ્યો છે. આઇટી કર્મચારીઓના આ સંગઠને માંગ કરી છે કે દેશના સમગ્ર આઇટી સેક્ટરમાં ફરી એકવાર વર્ક ફ્રોમ હોમ ફરજિયાત બનાવવામાં આવે. યુનિયને પોતાની રજૂઆતમાં જણાવ્યું છે કે કોરોના મહામારી દરમિયાન ઘરેથી કામ કરવાની પદ્ધતિ સંપૂર્ણપણે સફળ રહી હતી. જો લાખો આઇટી પ્રોફેશનલ્સને ઓફિસ જવામાંથી મુક્તિ આપવામાં આવે, તો દરરોજ લાખો લિટર પેટ્રોલ અને ડીઝલની બચત થઈ શકે છે. વડાપ્રધાનની ઇંધણ બચાવવાની તાજેતરની અપીલ બાદ આ માંગણીએ દેશભરમાં ખૂબ જ જોર પકડ્યું છે.