કાબુલ : અફઘાનિસ્તાન અત્યારે કુદરતના પ્રકોપ સામે લાચાર બન્યું છે. છેલ્લા કેટલાક મહિનાઓથી આ દેશ સતત એક પછી એક કુદરતી આફતોનો સામનો કરી રહ્યો છે. કંદહાર, હેરાત, ઘોર અને તખાર પ્રાંતોમાં રાતોરાત ત્રાટકેલા ભારે પવન, અચાનક આવેલું પૂર અને વિનાશક વાવાઝોડાના કારણે વધુ છ લોકોના કરુણ મોત નીપજ્યા છે અને અન્ય ૧૧ લોકો ગંભીર રીતે ઘાયલ થયા છે. અફઘાનિસ્તાન રાષ્ટ્રીય આપત્તિ વ્યવસ્થાપન સત્તામંડળ (ANDMA) ના જણાવ્યા અનુસાર, આ તાજેતરની આફતે પાયાની સુવિધાઓને ભારે નુકસાન પહોંચાડ્યું છે. કલાકના કિલોમીટરની ઝડપે ફૂંકાયેલા પવન અને વાવાઝોડાને કારણે કનેક્ટિવિટીના રસ્તાઓ, પાણીના કુવાઓ, હજારો એકર ખેતીની જમીન અને લાખો વૃક્ષો મૂળમાંથી ઉખડી ગયા છે.
આ ભયાનક વાવાઝોડામાં પ્રકૃતિના રક્ષણ માટે લગાવવામાં આવેલી સેંકડો મોંઘી સોલર પેનલો પણ પત્તાના મહેલની જેમ હવામાં ફંગોળાઈને નાશ પામી છે. ANDMA ના પ્રવક્તા મોહમ્મદ યુસુફ હમાદે આપત્તિની તીવ્રતા પર ચિંતા વ્યક્ત કરતા જણાવ્યું હતું કે, માત્ર ગત રાત્રિના તોફાનમાં જ ૨૦ થી વધુ પરિવારોના પાકા મકાનો સંપૂર્ણપણે જમીનદોસ્ત થઈ ગયા છે, જેના કારણે સ્થાનિક લોકો ખુલ્લા આકાશ નીચે આવી ગયા છે.
જો આંકડાઓ પર નજર કરીએ તો, અફઘાનિસ્તાનમાં ગત ૨૬ માર્ચથી શરૂ થયેલો આ આફતોનો સિલસિલો અટકવાનું નામ નથી લઈ રહ્યો. માર્ચ મહિનાથી અત્યાર સુધીમાં વિવિધ કુદરતી આફતોને કારણે સમગ્ર દેશમાં ૨૫૦ થી વધુ લોકો સત્તાવાર રીતે મૃત્યુ પામ્યા છે, જ્યારે ૩૪૪ થી વધુ લોકો ગંભીર રીતે ઇજાગ્રસ્ત થયા છે. આ આકાશી સુલ્તાનીના કારણે ૧૭,૦૦૦ થી વધુ પરિવારો સીધા પ્રભાવિત થયા છે અને આર્થિક રીતે પાયમાલ થઈ ગયા છે.
પરિસ્થિતિ એટલી હદે વણસી ગઈ છે કે વૈશ્વિક સંસ્થાઓએ પણ હવે મેદાનમાં આવવું પડ્યું છે. આંતરરાષ્ટ્રીય સ્થળાંતર સંગઠન (IOM) એ પોતાના તાજેતરના અહેવાલમાં જણાવ્યું છે કે અફઘાનિસ્તાનના નાંગરહાર પ્રાંતમાં તાજેતરમાં આવેલા ભયાનક પૂરે ભારે વિનાશ વેર્યો છે, જેમાં અંદાજે ૨,૦૦૦ જેટલા પરિવારો પૂરના પાણીમાં ફસાઈ ગયા છે અને તણાઈ ગયા છે. હાલમાં દેશના વિવિધ પ્રભાવિત વિસ્તારોમાં રાહત અને બચાવ કામગીરી યુદ્ધના ધોરણે ચાલી રહી છે, પરંતુ સંસાધનોની અછતને કારણે પીડિતો સુધી સહાય પહોંચાડવી એક મોટો પડકાર બની રહી છે.