ભિંડ :   મધ્યપ્રદેશમાં હાલ જનજીવન કુદરતના બેવડા પ્રકોપની ચક્કીમાં પીસાઈ રહ્યું છે. રાજ્યમાં એકતરફ નૌગાંવ અને ખજુરાહો સહિતના વિસ્તારોમાં પારો ૪૭ ડિગ્રી સેલ્સિયસને પાર પહોંચતા અસહ્ય હીટવેવની સ્થિતિ છે, ત્યારે બીજીતરફ અચાનક બદલાયેલા હવામાને ભારે તબાહી મચાવી છે. ભિંડ જિલ્લાના લહર વિભાગ હેઠળના માનગઢ ગામમાં શનિવારે પ્રચંડ વાવાઝોડા સાથે ત્રાટકેલા વરસાદે કાળો કેર વર્તાવ્યો છે. અહીં ભારે પવનના કારણે એક પાકા મકાનની કોંક્રિટની દીવાલ બાજુમાં આવેલા ટીન શેડ પર ધરાશાયી થઈ ગઈ હતી, જેના કારણે શેડ નીચે બાંધેલા ૩૬ ઘેટાંના ઘટનાસ્થળે જ કચડાઈ જવાથી કરુણ મોત નીપજ્યા છે.

આ ભયાનક હોનારત સમયે ટીન શેડ નીચે સૂઈ રહેલા પશુપાલક પરિવારના બે સભ્યો (એક પુરુષ અને એક મહિલા) કાટમાળ નીચે દટાતા ગંભીર રીતે ઘાયલ થયા છે. અકસ્માત બાદ સ્થાનિક ગ્રામજનોએ ભારે જહેમત ઉઠાવી બંનેને બહાર કાઢી નજીકની હોસ્પિટલમાં સારવાર અર્થે ખસેડ્યા હતા. ઘટનાની માહિતી મળતા જ પોલીસ અને પશુચિકિત્સા વિભાગની ટીમો કાફલા સાથે દોડી ગઈ હતી અને મૃત પશુઓનું પોસ્ટમોર્ટમ કરાવ્યું હતું. આ અણધારી આફતે ગરીબ પશુપાલક પરિવારની આજીવિકા સંપૂર્ણપણે છીનવી લેતા ગ્રામજનોએ સરકાર પાસે તાત્કાલિક આર્થિક વળતર અને સહાય આપવાની માંગ કરી છે.

હવામાન વિભાગના જણાવ્યા અનુસાર, મધ્યપ્રદેશના ૪૮ જિલ્લાઓમાં હાલ ગરમીનું રેડ એલર્ટ છે, પરંતુ તેની વચ્ચે જ એક શક્તિશાળી પશ્ચિમી વિક્ષેપ (વેસ્ટર્ન ડિસ્ટર્બન્સ) સક્રિય થતાં વાવાઝોડાની સ્થિતિ સર્જાઈ છે. આગામી દિવસોમાં ભોપાલ, ગ્વાલિયર, ઉજ્જૈન અને જબલપુર સહિતના વિસ્તારોમાં ૫૦ થી ૭૦ કિલોમીટર પ્રતિ કલાકની ઝડપે વિનાશક પવન ફૂંકાવા સાથે વરસાદ અને કરા પડવાની તીવ્ર આગાહી કરવામાં આવી છે. નિષ્ણાતોએ લોકોને ચેતવણી આપી છે કે બપોરે ભીષણ ગરમી અને સાંજે અચાનક ત્રાટકતા વાવાઝોડાના કારણે જર્જરિત મકાનો, મોટા ઝાડ અને ખુલ્લા વીજ વાયરોથી દૂર રહેવું, નહિતર આવી જાનમાલની મોટી દુર્ઘટનાઓ ફરી સર્જાઈ શકે છે.