કુલ્લુ (હિમાચલ પ્રદેશ): હિમાચલ પ્રદેશના કુલ્લુ જિલ્લાના આની વિસ્તારમાં શનિવારે સાંજે એક અત્યંત દુખદ અકસ્માત સર્જાયો હતો. અહીંના શમશર-ગુગરા રોડ પર આવેલા બાલી ઓલ પાસે તેજ આંધી અને તોફાન દરમિયાન રસ્તાની બાજુમાં ઉભેલું એક વિશાળ ચીડ (પાઈન)નું વૃક્ષ અચાનક ચાલતી બોલેરો જીપ પર પડ્યું હતું. આ ટક્કર એટલી ભયાનક હતી કે વાહન પર વૃક્ષ પડતા જ તે બેકાબૂ બની રસ્તા પરથી નીચે ગબડી પડ્યું હતું.
શિક્ષિકાઓ માટે સફર છેલ્લી સાબિત થઈ
આ અકસ્માત સમયે બોલેરોમાં ડ્રાઈવર સહિત કુલ સાત લોકો સવાર હતા, જેમાંથી છ મહિલા શિક્ષિકાઓ હતી. આ દુર્ઘટનામાં ચાર મહિલા શિક્ષિકાઓનું ઘટનાસ્થળે જ કમકમાટીભર્યું મોત નીપજ્યું છે, જ્યારે અન્ય ત્રણ લોકો ગંભીર રીતે ઘાયલ થયા છે. મૃતકોની ઓળખ સ્નેહ લતા, બંતી કૌંડલ, ઉષા કુમારી અને સીમા આઝાદ તરીકે થઈ છે. આ તમામ શિક્ષિકાઓ ફરજ પૂરી કરીને પરત ફરી રહી હતી ત્યારે કુદરતે આ ખેલ ખેલ્યો હતો.
બચાવ કામગીરી અને તંત્રની દોડધામ
ઘટનાની જાણ થતા જ સ્થાનિક લોકો અને પોલીસ પ્રશાસનની ટીમ ઘટનાસ્થળે પહોંચી ગઈ હતી. સ્થાનિકોની મદદથી ઘાયલોને તાત્કાલિક હોસ્પિટલ ખસેડવામાં આવ્યા હતા. ઘાયલોમાં ડ્રાઈવર સુરેશ ચંદ, તારા દેવી અને રીના કુમારીનો સમાવેશ થાય છે. પોલીસની પ્રાથમિક તપાસ મુજબ, આ અકસ્માત પાછળનું મુખ્ય કારણ અચાનક આવેલું ભીષણ વાવાઝોડું અને તેજ પવન છે.
સમગ્ર વિસ્તારમાં માતમનો માહોલ
એકસાથે ચાર શિક્ષિકાઓના મોતના સમાચાર મળતા જ આની સબડિવિઝન અને આસપાસના ગામોમાં શોકનું મોજું ફરી વળ્યું છે. શિક્ષણ જગતમાં પણ આ ઘટનાને લઈને ઘેરા શોકની લાગણી વ્યક્ત કરવામાં આવી રહી છે. વહીવટીતંત્ર દ્વારા મૃતકોના પરિવારજનોને શક્ય તમામ મદદ કરવાની ખાતરી આપવામાં આવી છે.