​નવી દિલ્હી, ૨૨ જુલાઈ: ​દેશભરમાં ચોમાસાની ઋતુ હવે સામાન્ય જનજીવન માટે મોટી આફત સાબિત થઈ રહી છે. ઉત્તરથી લઈને પૂર્વોત્તર ભારત સુધી કુદરતે એવો કહેર વર્તાવ્યો છે કે લાખો લોકો મુશ્કેલીમાં મુકાયા છે. દેશના અનેક રાજ્યોમાં અતિભારે વરસાદના કારણે ક્યાંક પૂર, ક્યાંક વાદળ ફાટવાની ઘટના તો ક્યાંક વિનાશક ભૂસ્ખલન થતાં મોટા પાયે જાનમાલનું નુકસાન થયું છે. ખાસ કરીને આસામ, હિમાચલ પ્રદેશ, જમ્મુ-કાશ્મીર સહિત નાગાલેન્ડ અને અરૂણાચલ પ્રદેશ જેવા રાજ્યો હાલમાં આ કુદરતી આપદાની ભયાનક ઝપેટમાં આવી ગયા છે. આ તમામ અસરગ્રસ્ત વિસ્તારોમાં વહીવટી તંત્ર અને સુરક્ષા દળો દ્વારા યુદ્ધના ધોરણે રાહત અને બચાવ કામગીરી શરૂ કરી દેવામાં આવી છે.

​આસામમાં પૂરની ભયાવહ સ્થિતિ: ૧૬ જિલ્લાના ૫.૬૪ લાખથી વધુ લોકો પ્રભાવિત

પૂર્વોત્તર રાજ્ય આસામમાં સતત વરસી રહેલા મૂસળધાર વરસાદને કારણે બ્રહ્મપુત્રા નદી સહિત તેની સહાયક નદીઓ દિખો, દેસાંગ અને ધનસિરી ભયજનક સપાટી વટાવીને વહી રહી છે. આસામ રાજ્ય આપદા પ્રબંધન પ્રાધિકરણ (ASDMA)ના સત્તાવાર અહેવાલ મુજબ, છેલ્લા ૨૪ કલાકમાં પૂરના કારણે વધુ ૨૧ લોકોએ જીવ ગુમાવ્યા છે, જેની સાથે જ રાજ્યમાં પૂરથી મરનારાઓનો કુલ આંકડો ૩૧ પર પહોંચી ગયો છે. હાલમાં રાજ્યના ૧૬ જિલ્લાના અંદાજે ૫.૬૪ લાખથી વધુ લોકો પૂરના પાણીની ચપેટમાં છે. જેમાં શિવસાગર જિલ્લો સૌથી વધુ પ્રભાવિત થયો છે, જ્યાં ૩.૫૯ લાખથી વધુ લોકો મુશ્કેલીનો સામનો કરી રહ્યા છે. આ ઉપરાંત ચરાઈદેવ, જોરહાટ અને ગોલાઘાટ જિલ્લામાં પણ સ્થિતિ અત્યંત નાજુક છે. પૂરના કારણે ૮૭૨ ગામો સંપૂર્ણ જળમગ્ન બન્યા છે. અસરગ્રસ્તો માટે ૭૧ રાહત શિબિરો અને ૨૦૨ રાહત વિતરણ કેન્દ્રો શરૂ કરાયા છે. પૂરના પાણી રેલ્વે ટ્રેક પર ફરી વળતા અનેક ટ્રેનો રદ અથવા ડાયવર્ટ કરવામાં આવી છે. મુખ્યમંત્રી હિમંત વિશ્વ શર્મા પોતે સ્થિતિની સમીક્ષા કરી રહ્યા છે.

​હિમાચલ પ્રદેશમાં વાદળ ફાટ્યું: કાંગડા, મંડી અને સિરમોરમાં રેડ એલર્ટ

બીજી તરફ પહાડી રાજ્ય હિમાચલ પ્રદેશમાં પણ કુદરતનો પ્રકોપ જોવા મળી રહ્યો છે. કાંગડા જિલ્લાની બોહ ઘાટીમાં વાદળ ફાટવાની ગંભીર ઘટના સામે આવી છે, જેના કારણે અચાનક ધસમસતો પૂરનો પ્રવાહ અને કાદવ ઘસી આવતા અનેક મકાનો, ગૌશાળાઓ અને ખેતીના પાકને ભારે નુકસાન થયું છે. પ્રશાસનની ત્વરિત કામગીરીને કારણે લોકોને સમયસર ખસેડાતા મોટી જાનહાની ટળી છે પરંતુ પશુધનને નુકસાન થયું છે. હવામાન વિભાગે કાંગડા, મંડી અને સિરમોર જિલ્લા માટે 'રેડ એલર્ટ' જાહેર કરતા તમામ શાળા-કોલેજો બંધ રાખવાની ફરજ પડી છે. કિનૌર જિલ્લામાં ભારે ભૂસ્ખલનને કારણે નેશનલ હાઈવે-૫ સંપૂર્ણ બંધ થઈ ગયો છે. રાજ્યમાં ૩૬ રસ્તાઓ, ૪૩ પીવાના પાણીની યોજનાઓ અને ૫ પાવર ટ્રાન્સફોર્મર ઠપ્પ થઈ ગયા છે.

​જમ્મુ-કાશ્મીરમાં ભૂસ્ખલનની આફત

જમ્મુ-કાશ્મીરના પહાડી વિસ્તારોમાં પણ અનરાધાર વરસાદના કારણે મોટા પાયે ભૂસ્ખલનની ઘટનાઓ બની છે. મુખ્ય માર્ગો પર પહાડોમાંથી વિશાળ શિલાઓ અને માટી ધસી પડવાને કારણે વાહનવ્યવહાર સંપૂર્ણ ખોરવાઈ ગયો છે અને હાઈવે પર સેંકડો વાહનો ફસાયા છે. માર્ગોને પુનઃ કાર્યરત કરવા માટે ભારે મશીનરી સાથે બચાવ ટુકડીઓ તૈનાત કરવામાં આવી છે. સમગ્ર દેશમાં સર્જાયેલી આ કટોકટીની સ્થિતિ વચ્ચે ભારતીય સેના, NDRF, SDRF અને સ્થાનિક ફાયર બ્રિગેડની ટીમો દિવસ-રાત જોયા વગર રેસ્ક્યૂ ઓપરેશન ચલાવીને લોકોને સુરક્ષિત સ્થળે પહોંચાડી રહી છે.