રુદ્રપ્રયાગ : ઉત્તરાખંડમાં સતત વરસી રહેલા મુશળધાર વરસાદને કારણે પર્વતોમાં મોટા પાયે ભૂસ્ખલન થયું છે, જેના પગલે રાજ્યમાં અત્યાર સુધીનો સૌથી મોટો ટ્રાફિક જામ સર્જાયો છે અને રુદ્રપ્રયાગમાં ભારે ભૂસ્ખલનને કારણે પ્રખ્યાત ચારધામ યાત્રા અસ્થાયી રૂપે રોકી દેવી પડી છે.

બદ્રીનાથ રાષ્ટ્રીય ધોરીમાર્ગ પર આવેલા સિરોબાગઢ ખાતે ધારી દેવી મંદિર નજીક ટેકરી પરથી અચાનક મોટી માત્રામાં કાટમાળ અને પથ્થરો હાઇવે પર પડવાથી ટ્રાફિક સંપૂર્ણપણે ખોરવાઈ ગયો છે, જેના કારણે માર્ગની બંને બાજુ આશરે ૪,૦૦૦ જેટલા શ્રદ્ધાળુઓ અને યાત્રાળુઓ કડકડતી ઠંડીમાં ફસાયા છે. વહીવટી તંત્ર દ્વારા કાટમાળ હટાવવા માટે મશીનરી તૈનાત કરવામાં આવી છે, પરંતુ ખરાબ હવામાન અને સતત પડતા કાટમાળને કારણે રાહત કામગીરીમાં ભારે અડચણ આવી રહી છે, પરિણામે વહીવટીતંત્રે કેદારનાથ યાત્રા સ્થગિત કરી દીધી છે જ્યારે હેલિકોપ્ટર સેવાઓ પહેલેથી જ બંધ છે.

સિરોબાગઢ ખાતે આ સમસ્યા નવી નથી કારણ કે છેલ્લાં લગભગ ત્રણ દાયકાથી ચોમાસાની ઋતુમાં આ વિસ્તાર હાઇવે માટે મોટો પડકાર બને છે, જ્યાં દર વર્ષે વરસાદ પડતાની સાથે જ ટેકરીઓમાંથી પથ્થરો પડવાનો સિલસિલો શરૂ થઈ જાય છે. બીજી તરફ, હવામાન વિભાગે ટિહરી, હરિદ્વાર, દેહરાદૂન અને પૌરીમાં રેડ એલર્ટ તથા નૈનિતાલ, રુદ્રપ્રયાગ, ચમોલી અને ઉત્તરકાશીમાં ઓરેન્જ એલર્ટ જારી કર્યું છે, જ્યારે ૧ જૂનથી ૨૫ સપ્ટેમ્બર દરમિયાન રાજ્યમાં ૧,૧૬૨ મીમી એટલે કે સામાન્ય કરતા એક ટકા વધુ વરસાદ નોંધાયો છે.

ભારે વરસાદના કારણે અલકનંદા અને મંદાકિની નદીઓ ભયજનક સપાટી વટાવીને છલકાઈ રહી છે, જેનાથી નદી કિનારાના સંવેદનશીલ વિસ્તારોમાં જોખમ વધતા રુદ્રપ્રયાગ વહીવટીતંત્ર અને પોલીસ દ્વારા લાઉડસ્પીકર દ્વારા લોકોને નદીઓથી દૂર રહેવા અને સલામત સ્થળે ખસવા સતત ચેતવણી આપવામાં આવી રહી છે.