મુંબઈ: નાર્કોટિક્સ કંટ્રોલ બ્યુરો (NCB) દ્વારા હાથ ધરવામાં આવેલા 'ઓપરેશન વ્હાઇટ સ્ટ્રાઇક' હેઠળ આંતરરાષ્ટ્રીય ડ્રગ્સ માર્કેટની કમર તોડી નાખતી અત્યાર સુધીની સૌથી મોટી કાર્યવાહી કરવામાં આવી છે. મુંબઈ અને ભીવંડીના વિસ્તારોમાં લાંબા સમયની ગુપ્ત તપાસ બાદ એજન્સીએ કુલ ૩૪૯ કિલો અત્યંત મોંઘા હાઈ-ગ્રેડ કોકેનનો જથ્થો જપ્ત કર્યો છે. વૈશ્વિક સ્તરે આ જપ્ત કરાયેલા માદક દ્રવ્યોની અંદાજિત કિંમત ₹૧૭૪૫ કરોડ થવા જાય છે. વડાપ્રધાન નરેન્દ્ર મોદીના 'ડ્રગ્સ મુક્ત ભારત'ના સંકલ્પને સાકાર કરવા માટે આ એક અત્યંત મહત્વનું પગલું માનવામાં આવે છે.

બે તબક્કાનું આયોજનબદ્ધ ઓપરેશન:

એજન્સીએ છેલ્લા છ મહિનાથી ચાંપતી નજર રાખ્યા બાદ આ મિશનને બે તબક્કામાં અંજામ આપ્યો હતો. પ્રથમ તબક્કામાં નવી મુંબઈના કલંબોલી ખાતેથી એક સીએનજી વાહન પકડાયું હતું, જેમાં ક્રિકેટના પેડ્સ અને ગ્લવ્સમાં કુશળતાપૂર્વક છુપાવેલું ૧૩૬ કિલો કોકેન મળી આવ્યું હતું. આ ધરપકડ બાદ મળેલી સચોટ કડીઓના આધારે બીજા તબક્કામાં ભીવંડીના એક ગોદામ પર ત્રાટકીને એજન્સીએ વધુ ૨૧૩ કિલો ડ્રગ્સ કબજે કર્યું હતું.

ટેકનોલોજી અને ડ્રગ્સનું નેટવર્ક:

આંતરરાષ્ટ્રીય સિન્ડિકેટ દ્વારા સ્કેનિંગ મશીનોને છેતરવા માટે ડ્રગ્સના પેકેટ પર નવ સ્તરીય હાઈ-ટેક પેકેજિંગ કરવામાં આવ્યું હતું. જેમાં કાળા ચીકણા પદાર્થનો લેયર લગાવાયો હતો, જેથી એરપોર્ટ કે બોર્ડર પર તપાસ દરમિયાન વાયરલ પકડાઈ ન શકે. આટલી મોટી માત્રા અને લોજિસ્ટિક્સ વ્યવસ્થા સૂચવે છે કે આ કોઈ મોટા નેટવર્કનું કામ છે.

કેન્દ્રીય ગૃહ મંત્રીની પ્રતિક્રિયા:

ગૃહ મંત્રી અમિત શાહે આ ઐતિહાસિક સફળતા માટે એનસીબીની ટીમને બિરદાવી છે. તેમણે સ્પષ્ટ કર્યું કે ડ્રગ્સના વેપારીઓ માટે ભારતમાં કોઈ સ્થાન નથી અને સરકાર તેમની સામે સખત કાર્યવાહી કરવાનું ચાલુ રાખશે. હાલમાં, આ સિન્ડિકેટના મુખ્ય સૂત્રધારો અને તેમના આર્થિક સ્ત્રોત સુધી પહોંચવા માટે એજન્સીએ તપાસ તેજ બનાવી છે.