રાંચી: ઝારખંડમાં યોજાયેલી રાજ્યસભાની ચૂંટણીના પરિણામો જાહેર થતાં જ રાજકીય ગરમાવો આવી ગયો છે. નેશનલ ડેમોક્રેટિક એલાયન્સ (NDA) ના મજબૂત સમર્થન સાથે ચૂંટણી મેદાનમાં ઉતરેલા અપક્ષ ઉમેદવાર પરિમલભાઈ નથવાણીએ આ ચૂંટણીમાં શાનદાર વિજય મેળવ્યો છે. જ્યારે ઇન્ડિયા (INDIA) ગઠબંધન તરફથી મેદાનમાં ઉતરેલા કોંગ્રેસના ઉમેદવાર પ્રણવ ઝાને પરાજયનો સામનો કરવો પડ્યો છે. આ પરિણામોને પગલે ઝારખંડના રાજકીય ગલિયારાઓમાં ભારે ચર્ચાઓ શરૂ થઈ ગઈ છે અને રાજ્યની હેમંત સોરેન સરકાર માટે આ એક બહુ મોટો રાજકીય આંચકો માનવામાં આવી રહ્યો છે.

 પરિમલભાઈ નથવાણીને મળ્યા ૩૦ મત, બે વોટ રદ થયા:

આ રસપ્રદ ચૂંટણીમાં અપક્ષ ઉમેદવાર પરિમલભાઈ નથવાણીએ જીત મેળવી છે. ચૂંટણીમાં તેઓને કુલ ૩૦ મત પ્રાપ્ત થયા હતા, જેમાંથી ૨૮ પ્રથમ પસંદગીના મતો એનડીએ અને અન્ય સમર્થકો તરફથી મળ્યા હતા. બીજી તરફ, સત્તાધારી ગઠબંધન સાથે જોડાયેલા કોંગ્રેસના ઉમેદવાર પ્રણવ ઝા માત્ર ૨૦ મતો જ મેળવી શક્યા હતા. આ સિવાય ચૂંટણી દરમિયાન કુલ ૨ મતો રદ જાહેર કરવામાં આવ્યા હતા. આ જ ચૂંટણીમાં ઝારખંડ મુક્તિ મોરચા (JMM) ના ઉમેદવાર વૈદ્યનાથ રામ પણ વિજેતા જાહેર થયા છે.

 ઝારખંડ ગઠબંધનમાં ગાબડું: વિપક્ષી ધારાસભ્યોનું ક્રોસ વોટિંગ:

ચૂંટણીના આંકડાઓ પર નજર નાખીએ તો એક વાત બિલકુલ સ્પષ્ટ થઈ ગઈ છે કે સત્તાધારી ગઠબંધન એટલે કે જેએમએમ, આરજેડી અને ડાબેરી છાવણીના કેટલાક ધારાસભ્યોએ પક્ષની લાઇનથી અલગ જઈને પરિમલભાઈ નથવાણીની તરફેણમાં ક્રોસ વોટિંગ કર્યું છે. આ ક્રોસ વોટિંગને કારણે કોંગ્રેસના ઉમેદવાર પ્રણવ ઝાને કારમી હારનો સામનો કરવો પડ્યો છે. ઇન્ડિયા ગઠબંધન માટે આ માત્ર એક બેઠકની હાર નથી, પરંતુ રાજ્ય સરકારના આંતરિક સંગઠન પર ઉઠેલા સવાલો છે. આ પરિણામો બાદ હવે ઝારખંડમાં રાજકીય અસ્થિરતાની શક્યતાઓ પણ નોંધપાત્ર રીતે વધી ગઈ છે.

 ચોથી ટર્મ માટે ચૂંટાતા પરિમલભાઈ નથવાણીએ ભાવુક પોસ્ટ શેર કરી:

રાજ્યસભા ચૂંટણીમાં ભવ્ય વિજય મેળવ્યા બાદ પરિમલભાઈ નથવાણીએ સોશિયલ મીડિયા પર એક અત્યંત ભાવુક પોસ્ટ શેર કરીને ઝારખંડની જનતા અને નેતૃત્વનો આભાર માન્યો હતો. તેઓએ લખ્યું કે, “રાજ્યસભાના સભ્ય તરીકે ચોથી ટર્મ માટે સેવા કરવાની તક મળવા બદલ હું ખૂબ જ કૃતજ્ઞ છું. આ ક્ષણ મારા માટે અત્યંત ભાવુક છે કારણ કે ઝારખંડમાંથી આ મારી ત્રીજી ટર્મ હશે, આ એ જ ભૂમિ છે જ્યાંથી વર્ષ ૨૦૦૮માં મારી સંસદીય સફર શરૂ થઈ હતી. મારી કર્મભૂમિ પર ફરી એકવાર પરત ફરવું એ મારા માટે ભારે ગૌરવ અને નમ્રતાની બાબત છે.”

તેઓએ વધુમાં વડાપ્રધાન નરેન્દ્રભાઈ મોદી, કેન્દ્રીય ગૃહમંત્રી અને સહકારિતા મંત્રી અમિતભાઈ શાહ, ભાજપના રાષ્ટ્રીય અધ્યક્ષ નિતિન નવીન અને ભાજપની આગેવાની હેઠળના એનડીએ ગઠબંધનનો તેમના અતૂટ સમર્થન બદલ નિષ્ઠાપૂર્વક આભાર માન્યો હતો. આ સાથે જ તેઓએ ઝારખંડ વિધાનસભાના દરેક સભ્યનો પણ આભાર વ્યક્ત કર્યો જેઓએ આ સફરમાં તેમને વોટ આપીને સાથ આપ્યો હતો. તેઓએ નવીકરણબદ્ધ પ્રતિબદ્ધતા અને નિષ્ઠા સાથે ઝારખંડ અને ત્યાંના લોકોના હિતો અને આકાંક્ષાઓને આગળ વધારવા માટે પોતાના પ્રયાસો સતત ચાલુ રાખવાનો સંકલ્પ વ્યક્ત કરતા અંતમાં ‘જોહાર ઝારખંડ’ લખ્યું હતું.