નાગપુર:દેશભરમાં ભારે ચર્ચાસ્પદ બનેલી નીટ-યુજી (NEET-UG) પુનઃપરીક્ષા વચ્ચે નેશનલ ટેસ્ટિંગ એજન્સી (NTA) ની એક ગંભીર ક્ષતિ અને ત્યારબાદ લેવાયેલા ત્વરિત નિર્ણયનો ચોંકાવનારો કિસ્સો સામે આવ્યો છે. નાગપુરના સ્થાનિક પરીક્ષાર્થી અબ્દુલ્લા મોહમ્મદ તાલિબને અગાઉ પુનઃપરીક્ષા માટે ભારતને બદલે સીધું સંયુક્ત અરબ અમીરાત (UAE) ના અબુ ધાબી સ્થિત પરીક્ષા કેન્દ્ર ફાળવી દેવામાં આવતા વિદ્યાર્થી અને તેનો પરિવાર ભારે અનિશ્ચિતતા અને ચિંતામાં મુકાઈ ગયો હતો. જો કે, આ મામલે ભારે વિરોધ અને રજૂઆતો બાદ છેલ્લી ઘડીએ એનટીએ (NTA) દ્વારા વિદ્યાર્થીની સમસ્યાનું સકારાત્મક નિવારણ લાવીને તેને નાગપુરમાં જ નવું પરીક્ષા કેન્દ્ર ફાળવવામાં આવ્યું છે, જ્યાં તે સફળતાપૂર્વક પરીક્ષા આપવા પહોંચ્યો હતો.
સમગ્ર વિગત એવી છે કે, દેશભરમાં અંદાજે ૨૨ લાખ જેટલા વિદ્યાર્થીઓ આ મેડિકલ પ્રવેશ પરીક્ષા આપી રહ્યા છે. આ દરમિયાન નાગપુરના વિદ્યાર્થી અબ્દુલ્લા મોહમ્મદ તાલિબે અગાઉ જ્યારે મુખ્ય નીટ પરીક્ષા આપી ત્યારે તેને નાગપુરની જ સરસ્વતી વિદ્યાલયમાં પરીક્ષા કેન્દ્ર ફાળવવામાં આવ્યું હતું. પરંતુ, મુખ્ય પરીક્ષામાં થયેલા પેપર લીક વિવાદ બાદ જ્યારે પુનઃપરીક્ષાનું આયોજન કરવામાં આવ્યું અને પરીક્ષાનો સમય ફરીથી નક્કી કરાયો, ત્યારે આ વિદ્યાર્થીએ પોતાનું નવું એડમિટ કાર્ડ ઓનલાઈન ડાઉનલોડ કર્યું હતું. નવું એડમિટ કાર્ડ જોતાં જ વિદ્યાર્થી અને તેનો પરિવાર સ્તબ્ધ થઈ ગયો હતો, કારણ કે તેનું પરીક્ષા કેન્દ્ર સીધું યુનાઇટેડ આરબ અમીરાત (UAE) ની અબુ ધાબી ઇન્ડિયન સ્કૂલમાં ટ્રાન્સફર કરી દેવામાં આવ્યું હતું.
પરિવારના જણાવ્યા અનુસાર, વિદ્યાર્થીએ ઓનલાઈન આવેદન પત્ર (એપ્લિકેશન ફોર્મ) ભરતી વખતે પોતાના મનપસંદ અને પ્રથમ પસંદગીના શહેર તરીકે નાગપુરની જ પસંદગી કરી હતી. આ ઉપરાંત વૈકલ્પિક પસંદગી તરીકે નજીકના વર્ધા અને ભંડારા શહેરને પસંદ કર્યા હતા. આમ છતાં, તબીબી પ્રવેશ પરીક્ષાના બરાબર એક દિવસ પહેલા જ કેન્દ્ર સીધું સાત સમુદ્ર પાર અબુ ધાબી ફાળવી દેવાતા વિદ્યાર્થી અને પરિવાર આર્થિક અને માનસિક રીતે ભારે મૂંઝવણમાં મુકાઈ ગયા હતા કે આટલા ટૂંકા સમયમાં વિદેશ કેવી રીતે પહોંચવું.
આ ગંભીર અને અણધારી ઘટનાની માહિતી મળતા જ મહારાષ્ટ્રના પૂર્વ શિક્ષણ મંત્રી ડૉ. અનીસ અહેમદે આ મામલે કડક વલણ અપનાવ્યું હતું. તેમણે પરીક્ષા આયોજિત કરતી મુખ્ય એજન્સી એનટીએ (NTA) ની આ ગંભીર બેદરકારી અને મોટી ચૂક અંગે જાહેરમાં કડી આલોચના કરી હતી. પૂર્વ શિક્ષણ મંત્રીએ તીવ્ર આક્રોશ સાથે એનટીએ (NTA) ને તાકીદે આગ્રહ કર્યો હતો કે એજન્સી પોતાની આ હિમાલય જેવડી ભૂલને તાત્કાલિક સુધારે અને વિદ્યાર્થીના ભવિષ્યને ધ્યાનમાં રાખીને તેને નાગપુર અથવા તેની આસપાસના જ કોઈ શહેરમાં નવું પરીક્ષા કેન્દ્ર ફાળવે.
રાજકીય અને સામાજિક સ્તરે થયેલી આ ઉગ્ર આલોચના અને રજૂઆતો બાદ નેશનલ ટેસ્ટિંગ એજન્સી સફાળી જાગી હતી અને પોતાની તકનીકી ભૂલ સ્વીકારીને તેમાં તાત્કાલિક સુધારો કર્યો હતો. એજન્સી દ્વારા અબ્દુલ્લા મોહમ્મદ તાલિબનું પરીક્ષા કેન્દ્ર અબુ ધાબીથી બદલીને નાગપુરની જ એક સ્થાનિક સ્કૂલ અને મેડિકલ કોલેજ ખાતે નિર્ધારિત કરી નવું એડમિટ કાર્ડ ઇસ્યુ કરાયું હતું. આખરે, એનટીએ દ્વારા સમયસર ભૂલ સુધારાતા વિદ્યાર્થી તાલિબ નાગપુર સ્થિત નિયત મેડિકલ કોલેજના પરીક્ષા કેન્દ્ર પર સુરક્ષિત રીતે પરીક્ષા આપવા પહોંચી શક્યો હતો, જેને પગલે પરિવારે ભારે રાહતનો શ્વાસ લીધો હતો.