નવી દિલ્હી : વડાપ્રધાન નરેન્દ્ર મોદીની ઈઝરાયલ મુલાકાત સાથે જ બંને દેશો વચ્ચેના વ્યાપારી સંબંધો નવી ઊંચાઈએ પહોંચ્યા છે. ઈઝરાયલના અર્થતંત્ર મંત્રી નીર બરકતે ભારતને "એશિયાનું પ્રવેશદ્વાર" ગણાવતા વિશ્વાસ વ્યક્ત કર્યો છે કે લાંબા સમયથી પ્રતીક્ષિત મુક્ત વેપાર કરાર (FTA) વર્ષ 2026 સુધીમાં વાસ્તવિકતા બની શકે છે. બંને દેશોની ટીમો હાલમાં આ પ્રક્રિયાને 'ફાસ્ટ ટ્રેક' પર લઈ જવા માટે સઘન વાટાઘાટો કરી રહી છે, જેનો ઉદ્દેશ્ય બંને લોકશાહી દેશો વચ્ચે આર્થિક સેતુને વધુ મજબૂત બનાવવાનો છે.

ઈઝરાયલ પાસે અત્યાધુનિક ટેકનોલોજી અને નવા વિચારો છે, જ્યારે ભારત પાસે તેનું વિશાળ બજાર અને ઉત્પાદન ક્ષમતા છે. મંત્રી બરકતે સ્પષ્ટ કર્યું કે ઈઝરાયલ ભારતને માત્ર ભાગીદાર જ નહીં, પરંતુ વૈશ્વિક અર્થતંત્રના મુખ્ય સ્તંભ તરીકે જુએ છે. ખાસ કરીને હાઇફા બંદર પર અદાણી જૂથના રોકાણ બાદ, ઈઝરાયલ ભારતીય કંપનીઓને ઈન્ફ્રાસ્ટ્રક્ચર ક્ષેત્રે વધુ પ્રોત્સાહન આપવા કટિબદ્ધ છે. 'મેક ઇન ઇન્ડિયા' અંતર્ગત સંરક્ષણ સાધનોનું સ્થાનિક સ્તરે ઉત્પાદન કરવા માટે પણ ઈઝરાયલે તૈયારી દર્શાવી છે.

G20 માં જાહેર થયેલ ભારત-મધ્ય પૂર્વ-યુરોપ આર્થિક કોરિડોર (IMEC) ને લઈને પણ ઈઝરાયલ ખૂબ જ ઉત્સાહિત છે. આ કોરિડોર માત્ર પરિવહન જ નહીં, પરંતુ ઉર્જા અને ડેટાના આદાનપ્રદાન માટે ગેમ-ચેન્જર સાબિત થશે. યુદ્ધવિરામ બાદ હવે આ વિઝન અમલીકરણ તરફ આગળ વધી રહ્યું છે, જેમાં સાઉદી અરેબિયા અને જોર્ડન સાથેના જોડાણો મહત્વના રહેશે. ભારત અને ઈઝરાયલ વચ્ચેના આ પ્રાચીન અને મજબૂત સંબંધો હવે આતંકવાદ સામેની લડાઈથી આગળ વધીને આર્થિક સમૃદ્ધિના નવા યુગમાં પ્રવેશી રહ્યા છે.