નવી દિલ્હી :વિશ્વભરમાં શ્વસનતંત્રને લગતા વાયરલ સંક્રમણો વચ્ચે કોરોના વાયરસના એક નવા અને ચર્ચાસ્પદ વેરિઅન્ટ 'PJ.2.1' એ વૈશ્વિક સ્તરે ચિંતાનું મોજું ફેલાવ્યું છે. કેનેડા, અમેરિકા અને યુરોપ સહિતના દેશોમાં ઝડપથી પગપેસારો કરી રહેલા આ નવા સ્ટ્રેઈનને લઈને ભારતમાં પણ આરોગ્ય વિભાગ અને તબીબી એજન્સીઓ દ્વારા સતર્કતા વધારી દેવામાં આવી છે.

પ્રાપ્ત વિગતો અનુસાર, ઓમિક્રોન પરિવારના વંશજ સમાન આ નવા વેરિઅન્ટના સ્પાઇક પ્રોટીનમાં નોંધપાત્ર ફેરફારો જોવા મળ્યા છે, જેના કારણે તે માનવ કોષો સાથે વધુ ઝડપથી જોડાઈ શકે છે. વૈશ્વિક સ્વાસ્થ્ય સંસ્થા (WHO) અને તબીબી નિષ્ણાતોના મતે, આ વેરિઅન્ટ અતિ ઘાતક નથી, પરંતુ તેના લક્ષણો સામાન્ય મોસમી ફ્લૂ અને શરદી જેવા જ હોવાથી તેની સમયસર ઓળખ કરવી મુશ્કેલ બને છે.

આ નવા વાયરસના સામાન્ય લક્ષણોમાં તાવ, કંપારી, સતત ખાંસી, ગળામાં દુખાવો, માથાનો દુખાવો અને શરીરમાં લાંબા સમય સુધી રહેતો ભારે થાક સામેલ છે. નિષ્ણાતોનું કહેવું છે કે સામાન્ય શરદી અને આ નવા સંક્રમણ વચ્ચે પાતળી ભેદરેખા હોવાથી દર્દીઓએ લક્ષણો દેખાતાની સાથે જ સ્વ-સારવાર ટાળીને તબીબી સલાહ લેવી અનિવાર્ય છે અને કોવિડ ટેસ્ટિંગ તેમજ જિનોમ સિક્વન્સિંગ દ્વારા જ તેની ચોક્કસ પુષ્ટિ થઈ શકે છે.

અગાઉના વર્ષોમાં મહામારી દરમિયાન થયેલા અનુભવોમાંથી શીખ લઈને ભારતીય આરોગ્ય વિભાગ દ્વારા એરપોર્ટ પર સ્ક્રિનિંગ અને આંતરરાષ્ટ્રીય પ્રવાસીઓ પર નજર રાખવા જેવા પગલાં લેવામાં આવ્યા છે. વરિષ્ઠ નાગરિકો અને અગાઉથી ગંભીર બીમારીઓથી પીડિત દર્દીઓએ ભીડભાડવાળી જગ્યાએ માસ્ક પહેરવા અને સાવચેતીના નિયમોનું પાલન કરવા અંગે તંત્ર દ્વારા વિશેષ અપીલ કરવામાં આવી છે.