મુંબઈ : મહારાષ્ટ્રમાં કનેક્ટિવિટીના એક નવા સુવર્ણ યુગનો પ્રારંભ થવા જઈ રહ્યો છે. કેન્દ્રીય બજેટમાં જાહેર કરવામાં આવેલા પૂર્વ-પશ્ચિમ રેલ કોરિડોરની મદદથી રાજ્યના એવા ગ્રામીણ અને અંતરિયાળ વિસ્તારોને પણ રેલ નેટવર્ક સાથે જોડવામાં આવશે, જે અત્યાર સુધી આ સુવિધાથી વંચિત હતા. દિલ્હીથી વીડિયો કોન્ફરન્સિંગ દ્વારા સીએસએમટી-સાવંતવાડી રોડ એક્સપ્રેસને લીલી ઝંડી બતાવતા રેલવે મંત્રી અશ્વિની વૈષ્ણવે આ મેગા પ્રોજેક્ટ અંગે સત્તાવાર જાહેરાત કરી હતી.

સુરતથી ડાનકુની સુધી સમર્પિત ટ્રેક: માલવાહક અને મુસાફરો માટે ખુશખબર

પ્રસ્તાવિત પૂર્વ-પશ્ચિમ કોરિડોર ગુજરાતના સુરતથી શરૂ થઈને પશ્ચિમ બંગાળના ડાનકુની સુધી વિસ્તરેલો હશે. આ કોરિડોરમાં માલગાડીઓ અને પેસેન્જર ટ્રેનો બંને માટે વિશેષ નેટવર્ક તૈયાર કરાશે. તેનાથી પશ્ચિમ મહારાષ્ટ્ર અને નાશિક જેવા આર્થિક રીતે મહત્ત્વના કેન્દ્રોને સીધો લાભ મળશે. મહારાષ્ટ્રના મુખ્યમંત્રી દેવેન્દ્ર ફડણવીસના સૂચન બાદ રેલવેની ટેકનિકલ ટીમે આ સમગ્ર રૂટને નવા ઔદ્યોગિક ક્ષેત્રો સાથે જોડવાનો સ્પેશિયલ પ્લાન તૈયાર કર્યો છે.

JNPT પોર્ટનો વિકાસ અને ઔદ્યોગિક વેગ

રેલવે મંત્રીએ વધુમાં ઉમેર્યું હતું કે 'ડેડિકેટેડ ફ્રેઇટ કોરિડોર'નું કામ પૂર્ણ થઈ ચૂક્યું છે. આ માર્ગ જવાહરલાલ નેહરુ પોર્ટ (JNPT) ને દેશના ઉત્તર, પૂર્વ અને મધ્ય ભાગો સાથે સીધો જોડી દેશે, જેથી માલસામાનની હેરફેર ઝડપી બનશે. આનાથી JNPT ખાતે વેપારી પ્રવૃત્તિઓ ધમધમશે અને મુંબઈ તેમજ તેની આસપાસના વિસ્તારોમાં મોટા પાયે નવું રોકાણ આવશે.

મુંબઈગરાઓ માટે લોકલ સેવાઓમાં ૧૦% વધારાનું આયોજન

માત્ર લાંબા અંતરની ટ્રેનો જ નહીં, પરંતુ મુંબઈની લાઈફલાઈન ગણાતી સબર્બન રેલવે સિસ્ટમને લઈને પણ મોટી જાહેરાત કરાઈ છે. હાલ મુંબઈમાં દરરોજ દોડતી આશરે ૩,૨૦૦ લોકલ ટ્રેન સેવાઓમાં ૧૦ ટકાનો વધારો કરવામાં આવશે, જેથી પીક અવર્સમાં ભીડ ઓછી થશે અને મુસાફરોનો પ્રવાસ વધુ આરામદાયક બનશે.

આ ભવ્ય કાર્યક્રમમાં કેન્દ્રીય વાણિજ્ય પ્રધાન પીયૂષ ગોયલ, મહારાષ્ટ્રના નાયબ મુખ્યપ્રધાન એકનાથ શિંદે, વિધાનસભા અધ્યક્ષ રાહુલ નાર્વેકર, પ્રધાન નિતેશ રાણે અને મુંબઈના મેયર રીતુ તાવડે જેવા દિગ્ગજ નેતાઓ વિશેષ રૂપે ઉપસ્થિત રહ્યા હતા.