વારાણસી, તા. 25: ભારતીય નાગરિક ઉડ્ડયન ક્ષેત્રે આજે એક ઐતિહાસિક દિવસ છે. કેન્દ્રીય નાગરિક ઉડ્ડયન મંત્રી કે. રામ મોહન નાયડુએ વારાણસી ખાતેથી દેશના મહત્વાકાંક્ષી 'હબ-એન્ડ-સ્પોક' એર કનેક્ટિવિટી મોડેલનો સત્તાવાર શુભારંભ કર્યો છે. આ નવી પહેલ હેઠળ, હવે ટાયર-2 અને ટાયર-3 શહેરોમાંથી આંતરરાષ્ટ્રીય મુસાફરી કરનારા પ્રવાસીઓ માટે મુસાફરી અત્યંત સરળ અને સુગમ બનશે.

શું છે આ 'હબ-એન્ડ-સ્પોક' મોડેલની વિશેષતા?

સામાન્ય રીતે આંતરરાષ્ટ્રીય મુસાફરી માટે મુસાફરોએ મોટા એરપોર્ટ પર જઈને લાંબી ઇમિગ્રેશન પ્રક્રિયામાંથી પસાર થવું પડતું હતું. પરંતુ હવે આ મોડેલ હેઠળ, મુસાફરો તેમના મૂળ એરપોર્ટ (જેમ કે વારાણસી) પર જ પોતાની ઇમિગ્રેશન ઔપચારિકતાઓ પૂર્ણ કરી શકશે. આ પછી, તેઓ દિલ્હી જેવા મોટા હબ એરપોર્ટ દ્વારા વિશ્વના કોઈપણ ખૂણે કોઈ પણ વધારાની પ્રક્રિયા વિના સરળતાથી આગળ વધી શકશે. આ વ્યવસ્થાના કારણે સમયની બચત થશે અને મુસાફરોને કનેક્ટિંગ ફ્લાઇટ્સમાં હાલાકી ભોગવવી નહીં પડે.

આગામી લક્ષ્ય: છ અઠવાડિયામાં છ નવા શહેરો

મંત્રી નાયડુએ જણાવ્યું હતું કે, “આજથી વારાણસીથી શરૂ થયેલી આ સેવા આવનારા સમયમાં ભારતના નાગરિક ઉડ્ડયન ક્ષેત્રનો ચહેરો બદલી નાખશે.” તેમણે વધુમાં માહિતી આપી હતી કે, આગામી છ અઠવાડિયામાં આ મોડેલ હેઠળ દેશના અન્ય છ મહત્વના શહેરોને જોડવામાં આવશે. ભારત પાસે હવે આંતરરાષ્ટ્રીય સ્તરની માળખાગત સુવિધાઓ અને સિસ્ટમ ઉપલબ્ધ છે, જે આ મોડેલને સફળ બનાવવા માટે સક્ષમ છે.

પરિવહન ક્ષેત્રે મોટો સુધારો

હાલમાં એર ઇન્ડિયા સાથે મળીને આ મોડેલનું સંચાલન કરવામાં આવી રહ્યું છે, જે વારાણસીને નવી દિલ્હી મારફતે વૈશ્વિક સ્તરે દુબઈ, સિંગાપોર અને અન્ય આંતરરાષ્ટ્રીય સ્થળો સાથે જોડે છે. તમામ હિસ્સેદારો સાથે મળીને આ માટેની 'સ્ટાન્ડર્ડ ઓપરેટિંગ પ્રોસિજર' (SOP) ને પણ અંતિમ સ્વરૂપ આપવામાં આવ્યું છે.

નાગરિક ઉડ્ડયન મંત્રીએ વિશ્વાસ વ્યક્ત કર્યો હતો કે આ મોડેલથી ભારત એક મોટા ઉડ્ડયન હબ તરીકે ઉભરી આવશે. આ પહેલથી પ્રવાસન અને વેપાર ક્ષેત્રે પણ વેગ આવશે, કારણ કે હવે નાના શહેરોના મુસાફરોને આંતરરાષ્ટ્રીય કનેક્ટિવિટી માટે મોટા મેટ્રો શહેરોમાં જઈને લાંબી પ્રક્રિયાઓમાંથી પસાર થવાની જરૂર નહીં રહે. આગામી દિવસોમાં કયા 6 શહેરો આ યાદીમાં જોડાશે, તે જાણવા માટે મુસાફરોમાં પણ ઉત્સુકતા જોવા મળી રહી છે.