નવી દિલ્હી:   કોરોનાવાયરસ પોતાના સ્વરૂપો બદલીને ફરી એકવાર વિશ્વભરમાં ચર્ચામાં આવ્યો છે, જ્યાં તેનો નવો પ્રકાર 'PJ.2.1' આરોગ્ય નિષ્ણાતો માટે એક નવો પડકાર બનીને ઊભર્યો છે. જૂન મહિનામાં યુનાઇટેડ સ્ટેટ્સમાં પહેલીવાર જોવા મળેલા આ વેરિઅન્ટે હવે વૈશ્વિક સ્તરે ધ્યાન ખેંચ્યું છે. વિશ્વ આરોગ્ય સંગઠન (WHO)ના તાજેતરના અહેવાલ મુજબ, આ નવો સબ-વેરિઅન્ટ અત્યંત ઝડપથી ફેલાવાની ક્ષમતા ધરાવે છે. જોકે, રાહતની વાત એ છે કે WHO એ તેને વધુ પડતો ખતરનાક ગણાવ્યો નથી, પણ તેના લક્ષણોએ તબીબી ક્ષેત્રે નવી મૂંઝવણ ઊભી કરી છે.

આ નવા પ્રકારની સૌથી મુશ્કેલ બાબત એ છે કે તેના લક્ષણો સામાન્ય ફ્લૂ અને વાયરલ શરદી-ઉધરસ સાથે આબેહૂબ મળે છે. અગાઉના કોવિડ વેરિઅન્ટ્સમાં સ્વાદ કે સુગંધ જતી રહેવી જેવાં ચોક્કસ લક્ષણો જોવા મળતાં હતાં, પણ PJ.2.1 માં ગળામાં તીવ્ર દુખાવો, સતત વહેતું નાક, ઉધરસ અને સાજા થયા પછી પણ અઠવાડિયાં સુધી પીછો ન છોડતો થાક મુખ્ય છે. રશિયન વાયરોલોજિસ્ટ એલેના માલિન્નિકોવા અને WHO ના મતે, હવે કેવળ શારીરિક લક્ષણો જોઈને સામાન્ય શરદી અને કોવિડ વચ્ચે તફાવત કરવો અશક્ય બની ગયો છે, જેના કારણે માત્ર ડૉક્ટરની તપાસ જ નહીં પણ ટેસ્ટિંગ અનિવાર્ય બન્યું છે.

PJ.2.1 ની ચોક્કસ ઓળખ માટે સામાન્ય રેપિડ એન્ટિજેન કે PCR ટેસ્ટથી માત્ર SARS-CoV-2 વાયરસની હાજરી જ જાણી શકાય છે, પરંતુ વેરિઅન્ટની ખાતરી માટે 'જીનોમ સિક્વન્સિંગ' જરૂરી બને છે. આરોગ્ય નિષ્ણાતોએ ખાસ કરીને વૃદ્ધો, નબળી પ્રતિકારક શક્તિ ધરાવતા લોકો અને પહેલાંથી જ હૃદય કે ફેફસાંની ગંભીર બીમારીઓથી પીડાતા દર્દીઓને વિશેષ સાવચેતી રાખવા સલાહ આપી છે. જો તાવ, શ્વાસ લેવામાં તકલીફ કે છાતીમાં સતત દુખાવો થાય, તો વિલંબ કર્યા વગર તબીબી સહાય લેવી અત્યંત જરૂરી છે.