ન્યૂયોર્ક:  ન્યૂયોર્ક સિટીના મેયર ઝોહરાન મામદાનીએ વર્ષોથી ચાલી આવતી પરંપરાને તોડીને આ વર્ષે પ્રતિષ્ઠિત 'મેટ ગાલા ૨૦૨૬' (Met Gala) માં હાજરી ન આપવાનો ચોંકાવનારો પણ પ્રેરણાદાયી નિર્ણય લીધો છે. ફેશન જગતની આ સૌથી મોટી ગ્લેમરસ રાત્રિમાં સેલિબ્રિટીઝ સાથે ફોટા પડાવવાને બદલે, મેયરે તે શ્રમિકો પર ધ્યાન કેન્દ્રિત કર્યું છે જેઓ પડદા પાછળ રહીને આ આખી ઈન્ડસ્ટ્રીને ચલાવે છે. સોશિયલ મીડિયા પ્લેટફોર્મ 'X' પર તેમણે આ અંગે વિગતવાર માહિતી શેર કરી હતી.
"કામદારો જ સાચી કલા છે"
મેયર મામદાનીએ પોતાની પોસ્ટમાં લખ્યું હતું કે, "જ્યારે આખું વિશ્વ ફેશનની સૌથી ભવ્ય રાત્રિ પર મીટ માંડીને બેઠું છે, ત્યારે અમે ગાર્મેન્ટ, રિટેલ અને વેરહાઉસ કામદારો તરફ દ્રષ્ટિ કરી રહ્યા છીએ જેઓ આ ઉદ્યોગના પાયામાં છે." તેમણે 'વર્ક ઓફ આર્ટ: ટર્નિંગ ધ લેન્સ ઓન ધ વર્કર્સ' શીર્ષક હેઠળ એક લેખ પણ પ્રકાશિત કર્યો હતો. ૩૪ વર્ષીય મેયર અને તેમની પત્ની રામા દુવાજીને આ ભવ્ય ઈવેન્ટનું આમંત્રણ આપવામાં આવ્યું હતું, પરંતુ તેમણે શ્રમિકોના હિત માટે તેને ઠુકરાવી દીધું હતું.
૬ કામદારોની પ્રેરણાદાયી વાતો
મેયર મામદાનીએ ફેશન ઉદ્યોગના પ્રતિનિધિ તરીકે ૬ વ્યક્તિઓને હાઈલાઈટ કર્યા હતા. જેમાં પાકિસ્તાનથી આવેલા ટેલર હફીઝ રઝા, માસ્ટર ટેલર અને યુનિયન લીડર ક્રિસ્ટોફર એન્ડરસન, મેક્સિકોથી આવીને મફત ટેલરિંગ સ્કૂલ ચલાવતી સોનિયા કાસ્ટ્રેજોન, મેસીની કર્મચારી અર્નેસ્ટાઇન ગે અને એમેઝોનના પૂર્વ ડિલિવરી વર્કર્સ લેટ્રિસ જોન્સન અને લેમોન્ટ હોપવેલનો સમાવેશ થાય છે. આ એવા લોકો છે જેઓ દિવસ-રાત મહેનત કરીને લક્ઝરી કપડાં અને ફેશન સામાન લોકો સુધી પહોંચાડે છે.
રાજકીય અને સામાજિક સંદેશ
મેયરનો આ નિર્ણય તેમના રાજકીય વિઝનને પણ સ્પષ્ટ કરે છે. ખાસ કરીને જ્યારે આ વર્ષના મેટ ગાલામાં એમેઝોનના સ્થાપક જેફ બેઝોસ માનદ અધ્યક્ષ તરીકે હાજર હતા, ત્યારે મેયર મામદાનીએ એમેઝોનના કામદારોના અધિકારોની વાત કરીને એક મોટો સંદેશ આપ્યો છે. અગાઉના મેયર એરિક એડમ્સ જેવા નેતાઓ પરંપરાગત રીતે આ ગાલામાં હાજરી આપતા આવ્યા છે, પરંતુ મામદાનીએ ગ્લેમરને બદલે લેબર (શ્રમ) ને મહત્વ આપીને ન્યૂયોર્કના સામાન્ય નાગરિકોના દિલ જીતી લીધા છે.