નવી દિલ્હી/અમદાવાદ તા.૧૪ : પશ્ચિમ એશિયામાં ઇરાન-અમેરિકા વચ્ચે વધેલા તણાવ અને હોર્મુઝની ખાડીમાં શિપિંગ રૂટને લઈને ઊભી થયેલી ચિંતાઓ વચ્ચે ભારત માટે રાહતના સમાચાર આવ્યા છે. ભારત આવતું LPG ટેન્કર *MV Sunshine* ગુરુવારે હોર્મુઝની ખાડી સુરક્ષિત રીતે પાર કરીને ભારત તરફ આગળ વધી રહ્યું છે. ભારતીય નૌસેના સહિતની બહુવિધ એજન્સીઓ જહાજની અવિરત અને સુરક્ષિત ગતિવિધિ માટે સંપૂર્ણ ઓપરેશનલ સહાય પૂરી પાડી રહી છે. ead9

 

 

15મું જહાજ સફળતાપૂર્વક રવાના

 

 

સૂત્રોના જણાવ્યા મુજબ, ચાલુ ક્ષેત્રીય અનિશ્ચિતતા દરમિયાન ફારસી ખાડીમાંથી ભારત માટે સુરક્ષિત રીતે રવાના કરાયેલું આ *15મું LPG જહાજ* છે. MV Sunshine વિયેતનામ-ફ્લેગ્ડ વેસલ છે, જે લગભગ 46,000 ટન રસોઈ ગેસ લઈને ન્યૂ મેંગલુરુ પોર્ટ તરફ જઈ રહ્યું છે. જહાજ પર 24 વિયેતનામી ક્રૂ મેમ્બર છે.

 

 

 

ઇરાનનો વિશ્વાસ: શાંતિ પછી હોર્મુઝ વધુ સુરક્ષિત બનશે

 

 

 

આ વચ્ચે, ઇરાનના કાયદા અને આંતરરાષ્ટ્રીય બાબતોના નાયબ વિદેશ મંત્રી કાઝેમ ગરીબાબાદીએ નવી દિલ્હીમાં જણાવ્યું કે, “શાંતિ સ્થપાશે ત્યારે હોર્મુઝની ખાડીની સ્થિતિ પહેલા કરતાં સારી બનશે. પારદર્શિતા રહેશે. અમે આંતરરાષ્ટ્રીય કાયદાથી આગળ નહીં જઈએ. શાંતિ સ્થપાશે તો વધુ સલામતી અને સુરક્ષા રહેશે”. 

 

 

ભારતની ઊર્જા સુરક્ષા: 41 જહાજોની યાદી તૈયાર

 

 

હોર્મુઝની ખાડી વિશ્વના સૌથી વ્યૂહાત્મક તેલ અને ગેસ ટ્રાન્ઝિટ કોરિડોરમાંની એક છે. ભારત તેની 85-90% LPG જરૂરિયાત આયાતથી પૂરી કરે છે, જેમાં મોટાભાગનો જથ્થો ખાડી દેશોમાંથી આવે છે. શિપિંગ મંત્રાલયે ફારસી ખાડીમાંથી પ્રાયોરિટી પર ખાલી કરાવવા માટે 41 જહાજોની યાદી તૈયાર કરી છે. હાલ પણ 13 ભારતીય-ધ્વજવાળા જહાજો ખાડીમાં છે.

 

 

અમદાવાદમાં LPGના ભાવ: ઘરેલુ સિલિન્ડર સ્થિર, કોમર્શિયલમાં મોટો વધારો

 

 

પશ્ચિમ એશિયાની કટોકટી વચ્ચે અમદાવાદમાં 14.2 કિલોનો ઘરેલુ LPG સિલિન્ડર આજે *₹920.00*ના ભાવે સ્થિર છે. માર્ચ 2026માં તેમાં ₹60નો વધારો થયો હતો અને ત્યારથી કોઈ ફેરફાર થયો નથી. જોકે, 19 કિલોના કોમર્શિયલ LPG સિલિન્ડરનો ભાવ મે 2026માં ₹993ના જંગી વધારા સાથે *₹3,091.00* થયો છે.

 

 

સરકારની તૈયારી

 

 

પેટ્રોલિયમ મંત્રી હરદીપ સિંહ પુરીએ જણાવ્યું કે પશ્ચિમ એશિયાની કટોકટીથી ઊર્જા પુરવઠામાં પડેલા વિક્ષેપને સરકારે સંભાળી લીધો છે અને ગ્રાહકો પર બોજ ઓછામાં ઓછો રાખ્યો છે. ભારતે સ્થાનિક LPG ઉત્પાદન પણ તીવ્રપણે વધાર્યું છે.