જયપુર : રાજસ્થાનના દક્ષિણ જિલ્લાઓમાં રાતે ગુલાબી ઠંડીનો અનુભવ થવા લાગ્યો છે. દિવસની ગરમીમાં પણ ઘટાડો નોંધાયો છે. આ સપ્તાહે હવામાન ચોખ્ખું રહેવાની શક્યતા છે, જ્યારે ૧૨ ઓક્ટોબરથી પશ્ચિમી વિક્ષોભના પ્રભાવને પગલે કેટલાક વિસ્તારોમાં હળવો વરસાદ પડી શકે છે.

જયપુર: રાજસ્થાનમાં સોમવારે તાપમાનમાં ઘટાડો થતાં રાત્રિના સમયે ઠંડક વધી હતી. ગિરિમથક માઉન્ટ આબુમાં તાપમાન ૧૫ ડિગ્રી સેલ્સિયસથી નીચે ઊતરી ગયું હતું. દક્ષિણ રાજસ્થાનના ઉદયપુર, ડુંગરપુર, સિરોહી અને પ્રતાપગઢ જેવા જિલ્લાઓમાં પણ રાતે ગુલાબી ઠંડીની શરૂઆત થઈ છે.

ઉદયપુરમાં સોમવારે લઘુતમ તાપમાન ૧૭.૬ ડિગ્રી સેલ્સિયસ નોંધાયું હતું. ડુંગરપુરમાં ૧૯.૬ ડિગ્રી, સિરોહીમાં ૧૮.૯ ડિગ્રી અને પ્રતાપગઢમાં ૧૯.૫ ડિગ્રી લઘુતમ તાપમાન નોંધાયું હતું.

પશ્ચિમ રાજસ્થાનના બાડમેર, જેસલમેર, જોધપુર, ફલોદી, શ્રીગંગાનગર, ચુરુ અને બીકાનેરમાં દિવસના તાપમાનમાં બે ડિગ્રી સુધીનો ઘટાડો થયો હતો. આ વિસ્તારોમાં પારો ૪૦ ડિગ્રીથી નીચે રહ્યો હતો. શ્રીગંગાનગરમાં મહત્તમ તાપમાન ૩૯.૭ ડિગ્રી સાથે સૌથી વધુ નોંધાયું હતું. ચુરુમાં ૩૯.૫ ડિગ્રી, બીકાનેરમાં ૩૮.૮ ડિગ્રી, જેસલમેરમાં ૩૮.૫ ડિગ્રી અને ફલોદીમાં ૩૮.૪ ડિગ્રી મહત્તમ તાપમાન રહ્યું હતું.

હવામાન વિજ્ઞાન કેન્દ્ર, જયપુરના જણાવ્યા પ્રમાણે આગામી દિવસોમાં મોટાભાગનાં શહેરોમાં મહત્તમ તાપમાન ૩૦થી ૪૦ ડિગ્રી સેલ્સિયસ વચ્ચે અને લઘુતમ તાપમાન ૧૮થી ૨૫ ડિગ્રી વચ્ચે રહેવાની શક્યતા છે. આ સપ્તાહ દરમિયાન રાજ્યમાં હવામાન ચોખ્ખું રહેવાનું અનુમાન છે.

૧૨ ઓક્ટોબરથી રાજ્યના હવામાનમાં ફેરફાર થઈ શકે છે. પશ્ચિમી વિક્ષોભ સક્રિય થતાં ઉત્તર-પશ્ચિમ જિલ્લાઓમાં વાદળો છવાવાની અને ક્યાંક ગાજવીજ સાથે હળવો વરસાદ થવાની શક્યતા વ્યક્ત કરવામાં આવી છે.