મુંબઈ, તા.10: દેશભરમાં એક્સપ્રેસવે અને ફ્લાયઓવર્સનું વિશાળ નેટવર્ક ઊભું કરનારા કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરી મુંબઈ-ગોવા નેશનલ હાઈવે (NH-66) ના નિર્માણમાં થઈ રહેલા અતિશય વિલંબને લઈને અત્યંત નારાજ અને વ્યથિત જોવા મળ્યા છે. એક જાહેર કાર્યક્રમ દરમિયાન પોતાની પીડા ઠાલવતા ગડકરીએ સ્પષ્ટ શબ્દોમાં કહ્યું કે, "મેં દેશભરમાં લાખો કરોડ રૂપિયાના રોડ પ્રોજેક્ટ્સ સમયસર પૂરા કર્યા, પરંતુ મુંબઈ-ગોવા હાઈવેનું કામ ૧૪ વર્ષ પછી પણ પૂરું ન થઈ શક્યું તે મારા માટે અત્યંત શરમજનક બાબત છે. હવે આ હાઈવેનું કામ પૂરું થશે તો પણ હું તેના ઉદ્ઘાટન સમારોહમાં હાજરી નહીં આપું."

૧૪ વર્ષથી લટકેલો પ્રોજેક્ટ અને મુસાફરોની હાલાકી

મુંબઈ-ગોવા હાઈવેનું ફોર-લેનિંગ કામ વર્ષ ૨૦૧૧માં શરૂ કરવામાં આવ્યું હતું. એક દાયકાથી વધુ સમય વીતી ગયો હોવા છતાં કોંકણ પટ્ટાના આ અત્યંત મહત્વપૂર્ણ હાઈવેનું કામ હજુ સુધી પૂરું થઈ શક્યું નથી. દર વર્ષે ગણેશોત્સવ દરમિયાન મુંબઈથી કોંકણ અને ગોવા જતાં લાખો ગણેશભક્તો તથા મુસાફરોને ખાડાવાળા રસ્તા અને ટ્રાફિક જામના કારણે કલાકો સુધી ભારે હાલાકી ભોગવવી પડે છે, જેના પર ગડકરીએ ઊંડા દુઃખની લાગણી વ્યક્ત કરી હતી.

કોન્ટ્રાક્ટર્સ અને ઓથોરિટી સામે કડક વલણ

પ્રોજેક્ટમાં થઈ રહેલા વિલંબ પાછળના કારણો આપતા કેન્દ્રીય મંત્રીએ જણાવ્યું કે, જમીન સંપાદન, પર્યાવરણીય મંજૂરીઓ, કાનૂની અડચણો અને નબળા કોન્ટ્રાક્ટરોના કારણે કામ સતત લંબાયું છે. તેમણે ઉમેર્યું કે, કામ છોડીને ભાગી ગયેલા કે ધીમી ગતિએ કામ કરનારા કોન્ટ્રાક્ટરોને બ્લેકલિસ્ટ કરવામાં આવ્યા છે. આ સાથે જ સંબંધિત એન્જિનિયરો અને અધિકારીઓને બાકી રહેલું કામ યુદ્ધના ધોરણે પૂર્ણ કરવા કડક આદેશો આપવામાં આવ્યા છે. મુંબઈ-ગોવા હાઈવેના મોટાભાગના ભાગનું કામ હવે અંતિમ તબક્કામાં છે, પરંતુ જ્યાં સુધી મુસાફરો માટે સમગ્ર રસ્તો સંપૂર્ણપણે સલામત અને સ્મૂથ નહીં બને ત્યાં સુધી સંતોષ નહીં થાય તેમ તેમણે સ્પષ્ટ કર્યું હતું.