નવી દિલ્હી:  દિલ્હી અને તેની આસપાસના રાષ્ટ્રીય રાજધાની ક્ષેત્ર (NCR) માં રહેતા વાહનચાલકો માટે એક અત્યંત મહત્વપૂર્ણ અને 'ચેતવણીની ઘંટડી' સમાન સમાચાર આવ્યા છે. પ્રદૂષણના અજગરથી ઘેરાયેલા દિલ્હી-NCRમાં હવાની ગુણવત્તા સુધારવા માટે એર ક્વોલિટી મેનેજમેન્ટ કમિશન (CAQM) એ એક અભૂતપૂર્વ અને કડક નિર્ણય લીધો છે. નવા સત્તાવાર આદેશ અનુસાર, આગામી ૧ ઓક્ટોબર, ૨૦૨૬ થી જો તમારી પાસે વાહનનું માન્ય પીયુસી (Pollution Under Control - PUC) પ્રમાણપત્ર નહીં હોય, તો તમને દિલ્હી-NCRના કોઈપણ પેટ્રોલ પંપ પર પેટ્રોલ, ડીઝલ, સીએનજી (CNG) કે એલપીજી (LPG) ઇંધણ આપવામાં આવશે નહીં. આ નિયમ લાગુ થતાં જ લાખો વાહનચાલકો માટે પોતાના વાહનનું પ્રદૂષણ સર્ટિફિકેટ સમયસર અપડેટ કરાવવું ફરજિયાત બની જશે.

આ કડક નિયમને જમીની સ્તરે સંપૂર્ણ પારદર્શિતા સાથે લાગુ કરવા માટે સરકારે હાઈ-ટેક ટેકનોલોજીનો સહારો લીધો છે. હવે દિલ્હી-NCRના તમામ પેટ્રોલ પંપ પર ઓટોમેટિક નંબર પ્લેટ રેકગ્નિશન  કેમેરા ફીટ કરવામાં આવશે. જેવા તમે વાહનમાં ઈંધણ પુરાવવા પેટ્રોલ પંપ પર પ્રવેશશો, કે તરત જ આ આધુનિક કેમેરા તમારા વાહનની નંબર પ્લેટને સ્કેન કરીને કેન્દ્રીય 'વાહન' અને PUCC ડેટાબેઝ સાથે તેની ડિજિટલ ચકાસણી કરશે. જો સિસ્ટમમાં તમારું PUC પ્રમાણપત્ર એક્સપાયર થયેલું અથવા અમાન્ય જણાશે, તો પેટ્રોલ પંપનું ફ્યુઅલ ડિસ્પેન્સિંગ મશીન આપોઆપ લોક થઈ જશે અને ઇંધણનો સપ્લાય બંધ થઈ જશે. જોકે, માનવતાના ધોરણે મેડિકલ કટોકટી, આપત્તિ રાહત કાર્ય અને કાયદો-વ્યવસ્થાની ફરજમાં રોકાયેલા સરકારી વાહનોને આમાંથી વિશેષ મુક્તિ આપવામાં આવશે.

કમિશનના અહેવાલ મુજબ, દિલ્હી-NCRમાં શિયાળા દરમિયાન જીવલેણ PM2.5 પ્રદૂષણમાં વાહનોના ધુમાડાનો હિસ્સો ૨૩% અને ઉનાળામાં આશરે ૧૮% જેટલો હોય છે, કારણ કે હજારો લોકો પીયુસી કરાવ્યા વિના જ રસ્તા પર વાહનો દોડાવે છે. આ ચોરી પકડવા માટે સરકારે હવે 'PUCC વર્ઝન ૨.૦' સિસ્ટમ પણ લોન્ચ કરી છે. આ નવી સિસ્ટમ અંતર્ગત પ્રદૂષણ ચેકિંગ સેન્ટર પર વાહનના લાઈવ ફોટો-વિડિયો લેવાશે અને સાયલન્સરમાં ટેસ્ટ પ્રોબ નાખતી વખતનો વિડિયો પણ જીપીએસ (GPS) લોકેશન સાથે મોબાઈલ એપ દ્વારા સીધો સરકારી સર્વર પર અપલોડ થશે, જેથી કોઈ નકલી સર્ટિફિકેટ ન બનાવી શકે. અગાઉ દિલ્હી સરકારે ૨૨ એપ્રિલ, ૨૦૨૬ ના રોજ આ અંગે પ્રાથમિક સૂચના બહાર પાડી હતી, જેને હવે સમગ્ર NCR પ્રદેશમાં કડક દંડાત્મક જોગવાઈઓ સાથે લાગુ કરી દેવામાં આવી છે.