પણજી : અદભુત દરિયાકાંઠાની રજાઓ માણવા માટે પ્રવાસીઓએ હવે વિદેશી સ્થળો તરફ દોટ મૂકવાની જરૂર નથી, કારણ કે તાજેતરમાં જ જાહેર થયેલા ગ્લોબલ બીચ ઇન્ડેક્સ ૨૦૨૬માં દક્ષિણ ગોવાના મનોહર પાલોલેમ બીચને એશિયાના સર્વશ્રેષ્ઠ અને વિશ્વના ટોચના છઠ્ઠા ક્રમના બીચ તરીકેનું ગૌરવ પ્રાપ્ત થયું છે.

પ્રાપ્ત વિગતો અનુસાર, વિશ્વના ૨૫ શ્રેષ્ઠ દરિયાકિનારામાં સ્થાન મેળવનાર પાલોલેમ એશિયા ખંડનું એકમાત્ર એવું સ્થળ છે, જેણે આ વૈશ્વિક યાદીમાં સ્થાન મેળવીને આંતરરાષ્ટ્રીય પ્રવાસન જગતમાં દેશનું નામ રોશન કર્યું છે.

આ અર્થપૂર્ણ રેન્કિંગ એવા સમયે સામે આવ્યું છે જ્યારે ગોવા તેની મુખ્ય પ્રવાસન મોસમમાં પ્રવેશ કરી રહ્યો છે, જ્યાં અર્ધચંદ્રાકાર આકારના કિનારા, સ્વચ્છ પીરોજ પાણી અને શાંત વાતાવરણ પ્રવાસીઓ માટે મુખ્ય આકર્ષણનું કેન્દ્ર બને છે.

નિષ્ણાતોના નામાંકન, હજારો મુલાકાતીઓની સમીક્ષાઓ તેમજ પાણીની સ્વચ્છતા તપાસતા નાસાના ડેટા સહિત ૧૮ જેટલા પ્રમાણિત પરિમાણોના સચોટ મૂલ્યાંકન બાદ આ ગ્લોબલ ઇન્ડેક્સ તૈયાર કરવામાં આવ્યો છે, જેમાં પાલોલેમે ઉત્કૃષ્ટ ગુણ પ્રાપ્ત કર્યા છે.

ઉત્તર ગોવાના અન્ય વ્યસ્ત અને ભીડભાડવાળા દરિયાકિનારાથી તદ્દન વિપરીત, પાલોલેમે પોતાની કુદરતી શાંતિ, સુંદર બીચ શેક્સ, યોગ કેન્દ્રો અને વોટર સ્પોર્ટ્સ જેવી સુવિધાઓ દ્વારા પ્રવાસીઓનું વિશેષ ધ્યાન ખેંચ્યું છે.
 

આંતરરાષ્ટ્રીય સ્તરે મળેલી આ શાનદાર માન્યતાથી આગામી સમયમાં ગોવા ખાતે વિદેશી અને સ્થાનિક પ્રવાસીઓની સંખ્યામાં મોટો વધારો થવાની સંભાવના છે, જે રાજ્યના પર્યટન ક્ષેત્ર માટે અત્યંત લાભદાયી સાબિત થશે.