કોલકાતા, તા. 17: પશ્ચિમ બંગાળમાં 2026ની વિધાનસભા ચૂંટણીનો શંખનાદ ફૂંકાઈ ચૂક્યો છે. પ્રથમ તબક્કાના મતદાન પહેલા પ્રચારના છેલ્લા અઠવાડિયામાં મહારાષ્ટ્રના મુખ્યમંત્રી અને ભાજપના દિગ્ગજ નેતા દેવેન્દ્ર ફડણવીસે બંગાળની ધરતી પરથી તૃણમૂલ કોંગ્રેસ (TMC) સરકાર વિરુદ્ધ મોરચો ખોલ્યો છે. ફડણવીસે આત્મવિશ્વાસ સાથે જણાવ્યું કે, આ વખતે બંગાળની જનતા પરિવર્તન માટે મક્કમ છે અને ભાજપ સત્તામાં આવશે.
પરિવર્તનનો પવન અને 'ડર'નો અંત
દેવેન્દ્ર ફડણવીસે ANI સાથેની વાતચીતમાં જણાવ્યું કે, "બંગાળના લોકો 15 વર્ષના શાસનથી કંટાળી ગયા છે અને હવે તેમના હૃદયનો અવાજ સાંભળી રહ્યા છે. 2021માં પણ લોકો પરિવર્તન ઈચ્છતા હતા, પરંતુ ત્યારે તેમના મનમાં ભય હતો. હવે પરિસ્થિતિ બદલાઈ છે, બંગાળ જાણી ગયું છે કે 'દર કે આગે જીત હૈ'. ભાજપ સરકાર આવતાની સાથે જ લોકોના મનમાંથી ડર દૂર થશે."
ઘૂસણખોરી અને રાષ્ટ્રવાદનો મુદ્દો
મમતા સરકાર પર આકરા પ્રહારો કરતા ફડણવીસે 'વોટ બેંક'ના રાજકારણનો મુદ્દો ઉઠાવ્યો હતો. તેમણે આક્ષેપ કર્યો કે મમતા બેનર્જીએ જાણી જોઈને ઘૂસણખોરોને આશ્રય આપીને રાજ્યની વસ્તી વિષયક સ્થિતિ બદલી નાખી છે. ફડણવીસે સ્પષ્ટ શબ્દોમાં ચેતવણી આપી કે, "પશ્ચિમ બંગાળમાં ભાજપ સરકાર બનતાની સાથે જ તમામ રાષ્ટ્રવિરોધી શક્તિઓ અને ઘૂસણખોરોને દેશની બહાર ફેંકી દેવામાં આવશે."
બહારના વ્યક્તિના નારા પર વળતો પ્રહાર
મમતા બેનર્જી વારંવાર ભાજપને 'બહારની પાર્ટી' ગણાવે છે, જેનો ફડણવીસે જડબાતોડ જવાબ આપતા શ્યામા પ્રસાદ મુખર્જીને યાદ કર્યા હતા. તેમણે કહ્યું, "અમારી પાર્ટીની શરૂઆત ડો. શ્યામા પ્રસાદ મુખર્જી દ્વારા કરવામાં આવી હતી, જેઓ બંગાળના પનોતા પુત્ર હતા. એટલે ભાજપ એ જ બંગાળની વાસ્તવિક પાર્ટી છે. અમને બહારના કહેવા તે બિલકુલ ખોટું છે, અમારા તમામ નેતાઓ શુદ્ધ બંગાળી છે."
આર્થિક પતન અને ઉદ્યોગોનું પલાયન
આર્થિક મોરચે પણ તેમણે TMC સરકારને ઘેરી હતી. ફડણવીસે દાવો કર્યો કે મમતા સરકારની નબળી નીતિઓ અને ભયના માહોલને કારણે અંદાજે 6000 જેટલા ઉદ્યોગો અને 100થી વધુ લિસ્ટેડ કંપનીઓએ પશ્ચિમ બંગાળ છોડી દીધું છે. તેમણે વચન આપ્યું કે ભાજપના શાસનમાં 'ઇઝ ઓફ ડુઇંગ બિઝનેસ' સાથે બંગાળ ફરીથી ઔદ્યોગિક હબ બનશે અને રોજગારીની નવી તકો ઉભી થશે.
નોંધનીય છે કે પશ્ચિમ બંગાળમાં 23 એપ્રિલ અને 29 એપ્રિલના રોજ બે તબક્કામાં મતદાન થવાનું છે, જેના પરિણામો 4 મેના રોજ જાહેર થશે. સતત ચોથી વાર જીતવા માંગતી TMC અને સત્તા કબજે કરવા મથતી ભાજપ વચ્ચે આ વખતે જંગ અત્યંત રોમાંચક બની રહ્યો છે.