નવી દિલ્હી | તા.૧૧: દેશભરના રાષ્ટ્રીય ધોરીમાર્ગો પર મુસાફરી કરનારા વાહનચાલકો માટે મોટા સમાચાર સામે આવ્યા છે. કેન્દ્ર સરકાર હવે ટોલ ટેક્સ વસૂલવાની પદ્ધતિમાં ક્રાંતિકારી ફેરફાર કરવા જઈ રહી છે. હવે તમારે ટોલ પ્લાઝા પર લાંબી કતારોમાં ઊભા રહેવું નહીં પડે કે ફાસ્ટેગ સ્કેન કરવા માટે ગાડી ધીમી પણ નહીં પાડવી પડે. કેન્દ્ર સરકાર ટૂંક સમયમાં મલ્ટી-લેન ફ્રી ફ્લો (MLFF) ટોલ સિસ્ટમ લાગુ કરવા જઈ રહી છે, જેનાથી હાઇવે પરની મુસાફરી રોકેટ ગતિએ અને અવરોધ વગરની બનશે.
કેન્દ્રીય માર્ગ પરિવહન મંત્રી નીતિન ગડકરીએ આ આધુનિક સિસ્ટમ વિશે માહિતી આપતા જણાવ્યું કે, સરકારનો ધ્યેય દેશના ટોલ પ્લાઝાને સંપૂર્ણપણે અવરોધમુક્ત બનાવવાનો છે. હાલમાં દેશમાં NHAI દ્વારા સંચાલિત ૧,૦૮૭ થી વધુ ટોલ પ્લાઝા છે, જ્યાં ફાસ્ટેગ હોવા છતાં ઘણીવાર ટ્રાફિક જામની સમસ્યા સર્જાય છે. નવી સિસ્ટમ આ સમસ્યાનો કાયમી ઉકેલ લાવશે.

કેવી રીતે કામ કરશે આ 'સ્માર્ટ' ટોલ સિસ્ટમ?
નવી MLFF ટેકનોલોજી સંપૂર્ણપણે આર્ટિફિશિયલ ઇન્ટેલિજન્સ (AI) અને હાઈ-ટેક કેમેરા પર આધારિત હશે:
•    ગેન્ટ્રી સિસ્ટમ: હાઇવે પર લોખંડના મોટા સ્ટ્રક્ચર (ગેન્ટ્રી) લગાવવામાં આવશે, જેમાં ANPR (ઓટોમેટિક નંબર પ્લેટ રેકગ્નિશન) કેમેરા અને RFID સ્કેનર હશે.
•    સ્પીડમાં વસૂલાત: તમારું વાહન ૮૦ કિમી પ્રતિ કલાકની ઝડપે પસાર થશે તો પણ આ કેમેરા સેકન્ડના ભાગમાં તમારી નંબર પ્લેટ અને ફાસ્ટેગ સ્કેન કરી લેશે.
•    ઓટોમેટિક પેમેન્ટ: સ્કેનિંગ થતાની સાથે જ ટોલની રકમ તમારા લિંક થયેલા બેંક ખાતા કે વોલેટમાંથી કપાઈ જશે. આ માટે તમારે વાહન રોકવાની કે બારી ખોલવાની પણ જરૂર નહીં પડે.

ગુજરાતમાં દેશનો પ્રથમ પ્રયોગ
ખાસ વાત એ છે કે, ગુજરાતના ચોર્યાસી ટોલ પ્લાઝા પર આ નવી ટેકનોલોજીનો દેશમાં સર્વપ્રથમ અમલ કરવામાં આવી રહ્યો છે. તેને ભારતના પ્રથમ 'બેરિયર-ફ્રી' એટલે કે અવરોધ-મુક્ત ટોલ પ્લાઝા તરીકે વિકસાવવામાં આવી રહ્યો છે. આ સિવાય હરિયાણાના ઘરૌંડામાં પણ તેની તૈયારીઓ તેજ કરી દેવામાં આવી છે.
મુસાફરોને શું થશે ફાયદો?
નવી સિસ્ટમ લાગુ થવાથી માત્ર સમય જ નહીં પરંતુ પૈસાની પણ બચત થશે. વાહનો સતત ગતિએ ચાલતા હોવાથી ઇંધણનો વપરાશ ઘટશે અને પ્રદૂષણમાં પણ ઘટાડો થશે. વધુમાં, ટોલ વસૂલાતની પ્રક્રિયા વધુ પારદર્શક બનશે.
સરકારે આગામી ૨૦૨૬ સુધીમાં દેશના મોટાભાગના વ્યસ્ત હાઇવે પર આ સિસ્ટમ લાગુ કરવાનું લક્ષ્ય રાખ્યું છે. ચાલુ નાણાકીય વર્ષમાં જ ૨૫ મુખ્ય નેશનલ હાઇવે પર આ ટેકનોલોજી સ્થાપિત કરવાની યોજના છે. આમ, આગામી દિવસોમાં હાઇવે પરની સફર ખરા અર્થમાં 'સુપરફાસ્ટ' બની જશે.