મુંબઈ, તા.૨૧: ભારતીય શેરબજારમાં અત્યાર સુધી રોકાણકારો માત્ર કંપનીઓની કમાણી, બેલેન્સ શીટ અને ગ્રોથ જોઈને જ પોતાના પૈસાનું રોકાણ કરતા હતા. પરંતુ હવે નૅશનલ સ્ટોક એક્સચેન્જ (NSE) ની પેટાકંપની 'NSE ઇન્ડેક્સ' એ નાણાકીય જગતમાં એક ક્રાંતિકારી અને સાંસ્કૃતિક ક્ષેત્રે મહત્વપૂર્ણ પગલું ભર્યું છે. NSE એ દેશનો પ્રથમ 'Nifty500 અહિંસા ઇન્ડેક્સ' લોન્ચ કર્યો છે, જે ભારતના સદીઓ જૂના 'અહિંસા'ના સિદ્ધાંતને મૂડી બજાર સાથે જોડવાનું અનોખું કામ કરશે.
આ નવો થિમેટિક ઇન્ડેક્સ એવા રોકાણકારો માટે ખાસ ડિઝાઇન કરવામાં આવ્યો છે જેઓ નૈતિકતા, ધાર્મિક મૂલ્યો અને પ્રાણી-કલ્યાણના વિચારો સાથે પોતાનું રોકાણ કરવા માગે છે. અહિંસા ફાઉન્ડેશનના સહયોગથી તૈયાર કરાયેલા 'અહિંસા ઇન્વેસ્ટમેન્ટ મૂવમેન્ટ' (AIM) ફ્રેમવર્ક હેઠળ નિફ્ટી-૫૦૦ બ્રહ્માંડની ૧,૧૦૦થી વધુ કંપનીઓનું સ્ક્રીનિંગ કરવામાં આવ્યું હતું, જેમાંથી ૩૨૬ કંપનીઓને 'ગ્રીન કેટેગરી'માં પસંદ કરીને આ ઇન્ડેક્સમાં સ્થાન આપવામાં આવ્યું છે.
આ કડક માપદંડોના આધારે થઈ પસંદગી
ઇન્ડેક્સનું ફ્રેમવર્ક અત્યંત પારદર્શક અને નિયમો આધારિત છે. આ ફ્રેમવર્ક હેઠળ પ્રાણીઓની ક્રૂરતા, દારૂ, તમાકુ, સંરક્ષણ (શસ્ત્રો), જુગાર અને પર્યાવરણને ગંભીર નુકસાન પહોંચાડતી 'ઓરેન્જ' અને 'રેડ' કેટેગરીની કંપનીઓને સંપૂર્ણપણે બાકાત રાખવામાં આવી છે.
આમ છતાં, આ ઇન્ડેક્સ કોઈ એક ચોક્કસ ક્ષેત્ર પૂરતો મર્યાદિત નથી. આમાં ઓટોમોબાઇલ, આઇટી, કેપિટલ ગુડ્સ અને ફાઇનાન્શિયલ સર્વિસીસ જેવા ૨૦ જેટલા વિવિધ ક્ષેત્રોની ટોચની કંપનીઓ શામેલ છે. તેના પ્રમુખ ઘટકોમાં ભારતી એરટેલ, ઇન્ફોસિસ, મહિન્દ્રા એન્ડ મહિન્દ્રા, ટાટા કન્સલ્ટન્સી સર્વિસીસ (TCS), મારુતિ સુઝુકી, NTPC, BSE, ટાટા સ્ટીલ, હિન્દાલ્કો અને અદાણી પોર્ટ્સ જેવી અગ્રણી કંપનીઓનો સમાવેશ થાય છે.
જૈન, શાકાહારી અને નૈતિક રોકાણકારો માટે સુવર્ણ તક
ભારતમાં મોટી સંખ્યામાં જૈન, શાકાહારી અને સામાજિક મૂલ્યોમાં માનતા રોકાણકારો છે, જેઓ હંમેશા એવા ફંડ્સની તલાશમાં હોય છે જ્યાં તેમના પૈસાનો ઉપયોગ પ્રાણી હિંસા કે અનૈતિક કામો માટે ન થતો હોય. અત્યાર સુધી તેમણે દરેક કંપનીના બિઝનેસ મોડલનો જાતે અભ્યાસ કરવો પડતો હતો. પરંતુ હવે, આ ઇન્ડેક્સના આધારે જ્યારે મ્યુચ્યુઅલ ફંડ હાઉસીસ અને એસેટ મેનેજમેન્ટ કંપનીઓ 'ETF' અને 'ઇન્ડેક્સ ફંડ્સ' લોન્ચ કરશે, ત્યારે રોકાણકારો માટે નૈતિક રોકાણ કરવું અત્યંત સરળ બની જશે.
આગામી સમયમાં વિદેશી સંસ્થાકીય રોકાણકારો (FIIs), ફેમિલી ઓફિસ અને NRI રોકાણકારો માટે પણ આ અહિંસા ઇન્ડેક્સ એક આકર્ષક કેન્દ્ર બનશે. ભારતીય શેરબજારમાં હવે માત્ર નફો જ નહીં, પણ નૈતિકતા પણ રોકાણનો નવો આધાર સ્તંભ બની રહી છે!