નાગપુર, તા.૧૨: ભારતના મુખ્ય ન્યાયાધીશ (CJI) સૂર્યકાંત દ્વારા કોંગ્રેસ નેતા રાહુલ ગાંધી અને મલ્લિકાર્જુન ખડગે સહિતના વિપક્ષી નેતાઓની મુલાકાતનો ઇનકાર કર્યા બાદ દેશમાં રાજકીય ગરમાવો વધી ગયો છે. આ મામલે મહારાષ્ટ્રના મુખ્યમંત્રી દેવેન્દ્ર ફડણવીસે વિપક્ષી 'ઈન્ડિયા' ગઠબંધન પર આકરા પ્રહારો કર્યા છે. તેમણે ગંભીર આરોપ લગાવ્યો હતો કે વિપક્ષી નેતાઓ દેશની બંધારણીય અને ન્યાયિક સંસ્થાઓને સતત બદનામ કરીને પ્રજાનો તેમનામાં રહેલો વિશ્વાસ ઘટાડવાનો નકારાત્મક પ્રયાસ કરી રહ્યા છે.

નાગપુર ખાતે પત્રકારો સાથે વાતચીત કરતાં ફડણવીસે જણાવ્યું હતું કે, જો વિપક્ષને દેશની ચૂંટણી પ્રક્રિયા કે અન્ય મુદ્દાઓ સામે કોઈ ફરિયાદ કે વાંધો હોય તો તેમણે સુપ્રીમ કોર્ટમાં કાયદાકીય અરજી દાખલ કરીને લડત આપવી જોઈએ. તેમણે તીખો સવાલ ઉઠાવ્યો હતો કે દેશના બંધારણમાં ક્યાંય એવું લખ્યું છે ખરું કે મુખ્ય ન્યાયાધીશે વિરોધ પ્રદર્શન કે માર્ચ લઈને આવતા રાજકીય નેતાઓને મળવું જ પડે? તેમણે મુખ્ય ન્યાયાધીશ દ્વારા લેવાયેલા વલણને સંપૂર્ણપણે યોગ્ય ગણાવીને વિપક્ષ દ્વારા સુપ્રીમ કોર્ટ તરફ ઘેરાવ કે માર્ચ કાઢવાના નિર્ણયની આકરી ટીકા કરી હતી.

ફડણવીસે એવો પણ ગંભીર આક્ષેપ કર્યો હતો કે મુખ્ય ન્યાયાધીશે મુલાકાત આપવાનો ઇનકાર કર્યો તે પછી વિપક્ષી નેતાઓ દ્વારા તેમની વિરુદ્ધ અયોગ્ય અને અપમાનજનક ભાષાનો ઉપયોગ કરવામાં આવી રહ્યો છે. આ પ્રકારની વર્તણૂકથી દેશની સર્વોચ્ચ અદાલત અને ન્યાયતંત્રની ગરિમાને મોટું નુકસાન પહોંચી રહ્યું છે. તેમણે ઉમેર્યું હતું કે લોકશાહીમાં સંસ્થાઓ પ્રત્યે અનાદર દર્શાવવો એ અત્યંત ચિંતાજનક બાબત છે.

ઉલ્લેખનીય છે કે, છેલ્લા કેટલાક દિવસોથી મુખ્ય ચૂંટણી કમિશનર જ્ઞાનેશ કુમારના રાજીનામા અને કથિત 'વોટ ચોરી' ના આરોપોને લઈને વિપક્ષી ગઠબંધને ૧૨ ઓક્ટોબરે સુપ્રીમ કોર્ટ સુધી માર્ચ કાઢવાની જાહેરાત કરી હતી. રાહુલ ગાંધી અને મલ્લિકાર્જુન ખડગેએ CJI સૂર્યકાંત પાસે મુલાકાત માંગતા ન્યાયાધીશે સ્પષ્ટ કર્યું હતું કે સંબંધિત મુદ્દાઓ અદાલત સમક્ષ પહેલેથી જ વિચારાધીન છે, તેથી કાયદાકીય પ્રક્રિયાનો જ આશ્રય લેવો યોગ્ય રહેશે. આ ઘટનાક્રમ બાદ ભાજપ અને વિપક્ષ વચ્ચે રાજકીય વાકયુદ્ધ ચરમસીમાએ પહોંચ્યું છે.