નવી દિલ્હી, : નેશનલ હાઈવે પર મુસાફરી કરતા વાહનચાલકો માટે લાંબા સમયથી માથાનો દુખાવો બનેલી ટોલ પ્લાઝા પરની ભીડ અને ટ્રાફિક જામની સમસ્યાનો કાયમી ઉકેલ લાવવા માટે નેશનલ હાઇવે ઓથોરિટી ઓફ ઇન્ડિયા (NHAI) એ એક મોટું અને ક્રાંતિકારી કદમ ઉઠાવ્યું છે. NHAI દ્વારા રાજસ્થાનમાં નેશનલ હાઇવે-48 (NH-48) ના સૌથી વ્યસ્ત ગણાતા દિલ્હી-જયપુર સેક્શન પર આવેલા 'દૌલતપુરા ટોલ પ્લાઝા' ખાતે ભારતની અદભુત અને હાઈટેક 'મલ્ટી-લેન ફ્રી ફ્લો' (MLFF) આધારિત ટોલિંગ સિસ્ટમનો સત્તાવાર પ્રારંભ કરી દેવામાં આવ્યો છે.

ગાડી થોભાવ્યા વગર સીધો જ કપાશે ટોલ ટેક્સ

માર્ગ પરિવહન અને ધોરીમાર્ગ મંત્રાલયના જણાવ્યા અનુસાર, આ નવી MLFF ટેકનોલોજી સંપૂર્ણપણે ઓટોમેટેડ છે અને તેમાં માનવીય હસ્તક્ષેપ નહિવત જેવો છે. આ સિસ્ટમ હેઠળ ટોલ પ્લાઝા પરના પરંપરાગત બેરિયર્સ (બૂમ ગેટ) હટાવી લેવામાં આવ્યા છે. હવે હાઈવે પરથી પસાર થતા વાહનોએ ટોલ ચૂકવવા માટે પ્લાઝા પર ઉભા રહેવાની કે ધીમા પડવાની કોઈ જરૂર નહીં રહે. વાહનો પોતાની સામાન્ય ગતિએથી સીધા જ પસાર થઈ શકશે અને હાઈટેક સેન્સર્સ તેમજ કેમેરાની મદદથી ચાલુ ગાડીએ ઓટોમેટિક ટોલ ટેક્સ કપાઈ જશે, જેનાથી ટ્રાફિકનો પ્રવાહ એકદમ સુગમ બનશે.

હજુ વધુ બે ટોલ પ્લાઝા ડિજિટલ બનશે, મુસાફરી થશે સુપરફાસ્ટ

દિલ્હી અને જયપુર વચ્ચેના પ્રવાસને વધુ આરામદાયક અને સમય બચાવનારો બનાવવા માટે સરકાર આગામી દિવસોમાં આ પ્રોજેક્ટનો વ્યાપ વધારવા જઈ રહી છે. દૌલતપુરા બાદ હવે NHAI દ્વારા આ જ હાઈવે સેક્શન પર આવેલા શાહજહાંપુર અને મનોહરપુર ખાતેના ટોલ પ્લાઝાને પણ ખૂબ જ ટૂંક સમયમાં આ આધુનિક 'મલ્ટી-લેન ફ્રી ફ્લો' સિસ્ટમમાં રૂપાંતરિત કરવાનું આયોજન ઘડી કાઢવામાં આવ્યું છે. આ ફેરફાર બાદ દિલ્હી-જયપુર હાઈવે દેશનો સૌથી આધુનિક અને અવરોધમુક્ત હાઈવે બની જશે.

પારદર્શિતા વધશે અને પર્યાવરણને પણ ફાયદો થશે

સરકારના મતે, આ નવી ડિજિટલ સિસ્ટમ લાગુ થવાથી દેશની ટોલિંગ ઇકોસિસ્ટમ અત્યંત મજબૂત અને પારદર્શક બનશે. ભૌતિક રીતે ટોલ પ્લાઝા ચલાવવા પાછળ થતા કરોડો રૂપિયાના સંચાલન ખર્ચ (Operating Cost) માં ધરખમ ઘટાડો થશે. આ ઉપરાંત, ટોલ નાકા પર વાહનો ઉભા ન રહેવાના કારણે ઇંધણની મોટી બચત થશે અને વાહનોના ધુમાડાથી થતા વાયુ પ્રદૂષણમાં પણ મોટો ઘટાડો નોંધાશે.