મુંબઈ : મુંબઈની સાયબર ક્રાઈમ પોલીસે એક હાઈ-પ્રોફાઈલ સાયબર ફ્રોડનો પર્દાફાશ કર્યો છે, જેમાં ગુજરાતના પૂર્વ રણજી ક્રિકેટર ઋષિ તુષાર અરોટ સહિત કુલ સાત લોકોની ધરપકડ કરવામાં આવી છે. આ ટોળકીએ આરે કોલોનીની એક વૃદ્ધ મહિલાને ‘ડિજિટલ અરેસ્ટ’ કરીને તેની પાસેથી રૂ. ૩૨.૭ લાખ પડાવી લીધા હતા. ચોંકાવનારી વાત એ છે કે ધરપકડ કરાયેલા ઋષિ અરોટના પિતા જાણીતા ક્રિકેટ કોચ છે, તેમ છતાં તેણે આ ગુનાખોરીનો માર્ગ અપનાવ્યો હતો.
આતંકવાદી હુમલાનું કનેક્શન બતાવી ડરાવ્યા
આ કૌભાંડની શરૂઆત ૧૧ ફેબ્રુઆરીએ થઈ હતી. ભોગ બનનાર વૃદ્ધાને એક અજાણ્યા નંબર પરથી ફોન આવ્યો હતો, જેમાં ફોન કરનારે પોતાને ચેન્નાઈ પોલીસનો સબ-ઇન્સ્પેક્ટર ગણાવ્યો હતો. ઠગબાજોએ દાવો કર્યો હતો કે મહિલાના સિમ કાર્ડનો ઉપયોગ ‘પહેલગામ હુમલા’માં સામેલ આતંકવાદી અફઝલ ખાન દ્વારા કરવામાં આવ્યો છે. આ સાંભળીને ગભરાયેલી મહિલાને વધુ ડરાવવા માટે ફોન મુંબઈ ATS ના વરિષ્ઠ અધિકારીને ટ્રાન્સફર કરવાનું નાટક કરવામાં આવ્યું હતું.
પોલીસ યુનિફોર્મ અને નકલી વોટ્સએપ પ્રોફાઇલનો ખેલ
ઠગબાજોએ મહિલાને વોટ્સએપ પર વીડિયો કોલ કર્યો હતો, જેમાં પ્રોફાઇલ પિક્ચરમાં ATS નો લોગો હતો અને ફોન કરનાર વ્યક્તિ પોલીસ યુનિફોર્મ પહેરીને બેઠો હતો. તેમણે મહિલાને તેના ફોન સાથે આખા ઘરમાં ફરવા કહ્યું જેથી તેઓ ચકાસી શકે કે ઘરમાં કોઈ છુપાયેલું નથી. આ દરમિયાન મહિલાને FIR, ધરપકડ વોરંટ અને ગોપનીયતા કરાર જેવા નકલી દસ્તાવેજો મોકલીને સંપૂર્ણપણે માનસિક રીતે તોડી પાડવામાં આવી હતી.
પુત્રના નામે આપી ધમકી
છેતરપિંડી કરનારાઓ પાસે મહિલાના પરિવારની તમામ માહિતી હતી. તેમણે ધમકી આપી કે તેમનો પુત્ર બર્લિનમાં છે અને તે જેવો મુંબઈ પાછો આવશે કે તેને એરપોર્ટ પરથી જ પકડી લેવામાં આવશે. આ સાંભળીને ગભરાયેલી વૃદ્ધાએ ૧૧ થી ૧૬ ફેબ્રુઆરી દરમિયાન ટુકડે-ટુકડે કુલ ૩૨.૭ લાખ રૂપિયા ટ્રાન્સફર કરી દીધા. ઠગબાજોએ લુચ્ચાઈથી કહ્યું હતું કે RBI આ પૈસાની તપાસ કરીને ૪૮ કલાકમાં પરત કરી દેશે.
પુત્રના આગમન બાદ ભાંડો ફૂટ્યો
૧૬ ફેબ્રુઆરીએ જ્યારે મહિલાનો પુત્ર બર્લિનથી ઘરે પરત આવ્યો, ત્યારે આખી હકીકત સામે આવી. સાયબર પોલીસે તપાસ હાથ ધરતા માલૂમ પડ્યું કે આ ઠગબાજો છેતરપિંડીના પૈસા ટ્રાન્સફર કરવામાં મદદ કરતા હતા. ઋષિ, હર્ષ અને નિખિલ નામના આરોપીઓ મુખ્ય માસ્ટરમાઇન્ડને ફંડ પહોંચાડતા હતા.
સાયબર પોલીસ હવે આ ટોળકીના અન્ય સભ્યો અને આ કૌભાંડના મૂળ સુધી પહોંચવા માટે ગુજરાત અને મુંબઈમાં વધુ તપાસ કરી રહી છે. નાગરિકોને અપીલ કરવામાં આવી છે કે કોઈ પણ પોલીસ અધિકારી વીડિયો કોલ પર આવી રીતે ‘ડિજિટલ અરેસ્ટ’ કરી શકતા નથી, માટે આવા ફોનથી સાવધ રહેવું.