મુંબઈ, : આદિવાસી સ્વતંત્રતા સેનાની ભગવાન બિરસા મુંડાની જન્મજયંતિ અને 'જનજાતીય ગૌરવ દિવસ'ના અવસર પર વડાપ્રધાન નરેન્દ્રભાઈ મોદી આગામી ૧૫ નવેમ્બરે મહારાષ્ટ્રના ગડચિરોલી જિલ્લામાં આયોજિત રાજ્ય-સ્તરીય કાર્યક્રમને વીડિયો કોન્ફરન્સિંગના માધ્યમથી વિશેષ સંબોધન કરશે.

પ્રાપ્ત વિગતો અનુસાર, મહારાષ્ટ્ર સરકાર દ્વારા અનુસૂચિત જનજાતિઓના સામાજિક, શૈક્ષણિક, આર્થિક અને સાંસ્કૃતિક ઉત્થાનને પ્રોત્સાહન પૂરું પાડવાના ઉદ્દેશ્યથી સમગ્ર રાજ્યમાં ૧૧ થી ૧૮ નવેમ્બર દરમિયાન 'ભગવાન બિરસા મુંડા ગૌરવ સપ્તાહ'ની ઉજવણી કરવામાં આવી રહી છે.

મંત્રી અશોક ઉઈકે અને આશિષ શેલારે પત્રકારોને માહિતી આપતા જણાવ્યું હતું કે આ સપ્તાહ દરમિયાન આર્થિક સહાય વિતરણ, મહિલા સ્વ-સહાય જૂથોને પ્રોત્સાહન, દસ્તાવેજ શિબિરો અને આદિવાસી વિદ્યાર્થીઓ માટે ખાસ કલ્યાણકારી પ્રવૃત્તિઓનું આયોજન કરવામાં આવ્યું છે.

આદિવાસી શિક્ષણ અને સ્વાસ્થ્ય ક્ષેત્રે મહત્વપૂર્ણ પગલાં ભરતા રાજ્ય સરકાર દ્વારા શાળાઓમાં ૩,૦૦૦ થી વધુ કરાર આધારિત શિક્ષકોની નિયુક્તિ કરવામાં આવી છે તેમજ વીર રાઘોજી ભાંગરેના નામે વિશેષ શિષ્યવૃત્તિ યોજના પણ શરૂ કરાઈ છે.

સરકાર દ્વારા આદિવાસી સંસ્કૃતિ, ઇતિહાસ અને પરંપરાઓના સંશોધન માટે યુનિવર્સિટી-સ્તરના અભ્યાસ કેન્દ્રો સ્થાપિત કરવાનો તેમજ ૨૦૧૧ની વસ્તી ગણતરીના આધારે સમુદાયોની જરૂરિયાતોનું સચોટ મૂલ્યાંકન કરવાનો પણ મહત્વનો નિર્ણય લેવામાં આવ્યો છે.
 

દેશભરમાં જનજાતીય નાયકોના બલિદાનને યાદ કરીને તેમના સન્માનમાં યોજાતી આ સપ્તાહભરની પ્રવૃત્તિઓથી આદિવાસી સમાજના સશક્તિકરણને વેગ મળશે અને આગામી દિવસોમાં વિકાસના નવા દ્વાર ખુલી જશે.