રાયગઢ-અલીબાગ : આજના સમયમાં ઓનલાઇન ગેમિંગનું વ્યસન કેટલું ભયાનક હોઈ શકે છે, તેનો જીવતો જાગતો કિસ્સો રાયગઢના નાગોથાણે વિસ્તારમાં સામે આવ્યો છે. ઓનલાઇન રમીમાં હજારો રૂપિયા હારી ગયા બાદ દેવામાં ડૂબેલા એક 23 વર્ષીય યુવાને પોતાની લોન ભરવા માટે ચોરીનો રસ્તો અપનાવ્યો હતો. રાયગઢ-અલીબાગ સ્થાનિક ક્રાઇમ બ્રાન્ચે આદિત્ય કુઠે નામના આ શખ્સની ધરપકડ કરીને પંથકમાં ફેલાયેલા ભયના વાતાવરણનો અંત આણ્યો છે.
ધાર્મિક પ્રસંગોનો લેતો હતો ગેરલાભ
આરોપી આદિત્ય કુઠે એટલો ચાલાક હતો કે તે ગામમાં જ્યારે ભજન, હરિપથ કે કોઈ ધાર્મિક કાર્યક્રમ ચાલતો હોય ત્યારે જ ત્રાટકતો હતો. જ્યારે આખું ગામ ભક્તિમાં લીન હોય અને પરિવારો ઘર બંધ કરીને બહાર ગયા હોય, ત્યારે તે પાછળથી હાથ સાફ કરી લેતો હતો. શિહુ, બેંસ અને મુંધાણી જેવા ગામોમાં છેલ્લા ત્રણ વર્ષથી તેની ઘરફોડ ચોરીઓએ રહેવાસીઓની ઊંઘ હરામ કરી દીધી હતી.
CCTV ને પણ આપતો હતો હાથતાળી
ગામલોકોએ ચોરને પકડવા માટે સીસીટીવી કેમેરા પણ લગાવ્યા હતા. શરૂઆતમાં થોડો સમય ચોરીઓ બંધ રહી, પરંતુ આદિત્યએ એવા વિસ્તારો શોધ્યા જ્યાં કેમેરાની નજર ન પહોંચતી હોય. તે પોતે સ્થાનિક હોવાથી ભૌગોલિક સ્થિતિથી વાકેફ હતો, જેને કારણે તે લાંબા સમય સુધી પોલીસની પકડથી દૂર રહ્યો. અંતે રાયગઢના એસપી આંચલ દલાલે સ્પેશિયલ ટીમ બનાવી તપાસના આદેશ આપ્યા હતા.
બેંક રેકોર્ડ અને લાઈફસ્ટાઈલે પોલ ખોલી
ક્રાઈમ બ્રાન્ચને બાતમી મળી હતી કે આદિત્યની આવક મર્યાદિત હોવા છતાં તે મોંઘા સ્માર્ટફોન અને વાહનો પાછળ પાણીની જેમ પૈસા વાપરે છે. પોલીસે જ્યારે તેના બેંક રેકોર્ડ તપાસ્યા ત્યારે ચોંકાવનારી વિગતો સામે આવી. તેના ખાતામાંથી ઓનલાઈન રમી એપ્સમાં મોટાપાયે વ્યવહારો થયા હતા. પોલીસની કડક પૂછપરછમાં તેણે કબૂલાત કરી કે રમીમાં થયેલું લાખોનું નુકસાન ભરપાઈ કરવા તેણે ચોરીનો આશરો લીધો હતો.
2024 થી 2026 વચ્ચેના ગુનાઓનો પર્દાફાશ
આ ધરપકડથી પોલીસે છેલ્લા બે વર્ષમાં થયેલી ઓછામાં ઓછી પાંચ મોટી ઘરફોડ ચોરીઓના કેસ ઉકેલી નાખ્યા છે. હાલમાં તેને નાગોથાણે પોલીસને સોંપવામાં આવ્યો છે. પોલીસને આશંકા છે કે તેની પૂછપરછમાં અન્ય પણ ઘણા મોટા ખુલાસા થઈ શકે છે.
 
યુવાનો માટે ચેતવણી:
•    વ્યસન: ઓનલાઇન ગેમિંગ માત્ર પૈસા જ નહીં, ચારિત્ર્ય પણ બગાડે છે.
•    દેવું: ડિજિટલ જુગારનું દેવું યુવાનોને ગંભીર ગુનાઓ કરવા તરફ ધકેલી રહ્યું છે.
•    સાવચેતી: બંધ ઘર કે ધાર્મિક કાર્યક્રમો વખતે પડોશીઓ અને પોલીસને સતર્ક રહેવા અપીલ.
આ કિસ્સો સમાજ માટે લાલબત્તી સમાન છે કે કેવી રીતે એક હોનહાર યુવાન ડિજિટલ જુગારના ચક્કરમાં પડીને જેલના સળિયા પાછળ પહોંચી ગયો.