જયપુર : ભારતીય સૈન્યના ઈતિહાસમાં સુવર્ણ અક્ષરે લખાયેલા 'ઓપરેશન સિંદૂર'ને આજે એક વર્ષ પૂર્ણ થયું છે. આ પ્રસંગે રાજસ્થાનના જયપુરમાં આયોજિત એક હાઈ-પ્રોફાઈલ પ્રેસ કોન્ફરન્સમાં સેનાના ત્રણેય પાંખના વડાઓએ સ્પષ્ટ સંદેશ આપ્યો છે કે, ઓપરેશન ભલે અટક્યું હોય પણ આતંકવાદ સામે ભારતની લડાઈ હજુ પૂરી થઈ નથી. મે ૨૦૨૫માં પહેલગામ આતંકી હુમલામાં ૨૬ નિર્દોષ નાગરિકોના મોતનો બદલો લેવા માટે ભારતે આ પરાક્રમી ઓપરેશન હાથ ધર્યું હતું.
લેફ્ટનન્ટ જનરલ રાજીવ ઘાઈએ ખુલાસો કર્યો હતો કે ઓપરેશન શરૂ કરતા પહેલા ભારત સરકાર તરફથી સેનાને બે સ્પષ્ટ દિશાનિર્દેશો આપવામાં આવ્યા હતા: પ્રથમ, સ્પષ્ટ રાજકીય-સૈન્ય ઉદ્દેશ્યો અને બીજું, ઓપરેશનલ લવચીકતા (Operational Flexibility). આ ઓપરેશન દરમિયાન ભારતીય સેનાએ લાઇન ઓફ કંટ્રોલ (LoC) પાર સાત અને વાયુસેનાએ બે આતંકી લક્ષ્યો પર સચોટ પ્રહાર કર્યા હતા. આ હુમલા એટલા ચોકસાઈભર્યા હતા કે પાકિસ્તાન પ્રેરિત આતંકી માળખાને જંગી નુકસાન પહોંચ્યું હતું અને દુશ્મનોને સ્પષ્ટ સંદેશ મળ્યો હતો કે હવે કોઈ પણ સુરક્ષિત નથી.
આત્મનિર્ભર શસ્ત્રોનો રહ્યો દબદબો
આ ઓપરેશનની સૌથી મોટી ખાસિયત 'મેક ઇન ઇન્ડિયા' શસ્ત્રોનું પ્રદર્શન હતું. લેફ્ટનન્ટ જનરલ ઘાઈએ જણાવ્યું કે બ્રહ્મોસ મિસાઈલ, આકાશ એર ડિફેન્સ સિસ્ટમ અને સ્વદેશી સર્વેલન્સ સિસ્ટમ આ યુદ્ધમાં 'ફોર્સ મલ્ટિપ્લાયર' સાબિત થયા હતા. હાલમાં ભારતના ૬૫ ટકાથી વધુ સંરક્ષણ સાધનો દેશમાં જ બને છે, જે ઓપરેશન સિંદૂર દરમિયાન નિર્ણાયક સાબિત થયા હતા. વાયુસેનાના એર માર્શલ ભારતીએ કહ્યું કે, "ભારતની શાંતિની ઈચ્છાને નબળાઈ ન સમજવી જોઈએ. જ્યારે અમે પગલાં લઈએ છીએ, ત્યારે કોઈ અધૂરી તૈયારી હોતી નથી."
નૌકાસેનાની ધાક અને વ્યૂહાત્મક જીત
નૌકાસેનાના વાઇસ એડમિરલ એ.એન. પ્રમોદે જણાવ્યું હતું કે પહેલગામ હુમલાના થોડા જ સમયમાં ભારતીય નૌકાસેના 'કોમ્બેટ રેડીનેસ' મોડમાં આવી ગઈ હતી. સમુદ્રમાં ભારતીય નૌકાસેનાની આક્રમક તૈનાતીને કારણે પાકિસ્તાની નૌકાદળ બેકફૂટ પર આવી ગયું હતું. આ ઓપરેશને સાબિત કર્યું કે ભારત અસમાન પડકારોનો સામનો કરવા માટે સંપૂર્ણ રીતે સજ્જ છે. આધુનિક યુદ્ધમાં ડ્રોન, લેયર્ડ ડિફેન્સ અને લોંગ રેન્જ હથિયારોની ભૂમિકા અત્યંત મહત્વની રહી હતી.
સેનાના વડાઓએ ભારતની જનતાને ખાતરી આપી છે કે સેનાની ત્રણેય પાંખ દુશ્મનને ગમે ત્યાં, ગમે ત્યારે અને ગમે તે રીતે પછાડવા માટે હંમેશા તૈયાર છે. ઓપરેશન સિંદૂર આજે વિશ્વભરમાં સૈન્ય અને વ્યૂહાત્મક રીતે 'ગોલ્ડ સ્ટાન્ડર્ડ' તરીકે સ્વીકારવામાં આવી રહ્યું છે.