નવી દિલ્હી :ચૂંટણી પંચની કામગીરી અને નિર્ણય પ્રક્રિયાને લઈને વિપક્ષ અને સરકાર વચ્ચેનો સંઘર્ષ હવે ચરમસીમાએ પહોંચ્યો છે. વિરોધ પક્ષો દ્વારા મુખ્ય ચૂંટણી કમિશનર  જ્ઞાનેશ કુમાર સામે સંસદના બંને ગૃહોમાં મહાભિયોગ  નોટિસ લાવવાની જોરશોરથી તૈયારીઓ શરૂ કરવામાં આવી છે. કોંગ્રેસના ઉચ્ચ સૂત્રો અનુસાર, INDIA ગઠબંધન સાથે ચર્ચા-વિચારણા બાદ આગામી બે અઠવાડિયાની અંદર સંસદમાં આ દૂર કરવાની નોટિસ આધિકારિક રીતે રજૂ કરી દેવામાં આવશે.

આ ગતિવિધિ પાછળ તાજેતરમાં સામે આવેલા એક મીડિયા રિપોર્ટને મુખ્ય કારણ માનવામાં આવી રહ્યું છે, જેમાં દાવો કરાયો હતો કે કમિશનના અન્ય બે સભ્યો—ચૂંટણી કમિશનર સુખબીર સિંહ સંધુ અને વિવેક જોશીએ છેલ્લા ૧૦ મહિના દરમિયાન રાષ્ટ્રવ્યાપી મતદાર યાદીઓના સઘન પુનરીક્ષણ (SIR) દરમિયાન નામ ઉમેરવા તેમજ રદ કરવા સહિતના અનેક મુદ્દાઓ પર ગંભીર વાંધાઓ ઉઠાવ્યા હતા. અગાઉ એપ્રિલ ૨૦૨૬માં પણ રાજ્યસભામાં ૭૩ સાંસદોની સહી સાથે દૂર કરવાની નોટિસ આપવામાં આવી હતી, પરંતુ હવે કોંગ્રેસે બંને ગૃહોમાં નવો પ્રસ્તાવ લાવવા માટે અન્ય વિપક્ષી દળોનો સંપર્ક સાધીને વ્યુહરચના ઘડી છે.

બીજી તરફ, આ વિવાદ સામે ચૂંટણી પંચે સ્પષ્ટતા જારી કરતાં જણાવ્યું છે કે કમિશનમાં ચર્ચા-વિચારણા દરમિયાન સભ્યો વચ્ચે અલગ-અલગ મંતવ્યો અને ભિન્નમતો હોવા એ એક સામાન્ય અને લોકશાહી પ્રક્રિયાનો ભાગ છે. કમિશન દ્વારા લેવામાં આવેલા તમામ નિર્ણયો પ્રસ્થાપિત વૈધાનિક અને કાનૂની જોગવાઈઓ મુજબ જ લેવામાં આવ્યા છે. બંધારણની કલમ ૩૨૪(૫) હેઠળ મુખ્ય ચૂંટણી કમિશનરને હોદ્દા પરથી દૂર કરવા માટે સુપ્રીમ કોર્ટના ન્યાયાધીશ જેવી જ જટિલ સંસદીય મહાભિયોગ પ્રક્રિયામાંથી પસાર થવું પડે છે, જેના માટે બંને ગૃહોમાં ખાસ બહુમતીની જરૂર પડે છે.