કોઈમ્બતુર | તા.18: લોકસભામાં સીમાંકન અને મહિલા અનામત સાથે જોડાયેલા બંધારણીય સુધારા બિલની નિષ્ફળતા બાદ વડાપ્રધાન નરેન્દ્ર મોદીએ શનિવારે સાંજે તમિલનાડુના કોઈમ્બતુરમાં એક વિરાટ જનસભાને સંબોધિત કરી હતી. પોતાના ભાષણ દરમિયાન પીએમ મોદીએ DMK, કોંગ્રેસ અને તેમના સાથી પક્ષો પર આકરા પ્રહારો કરતા આરોપ લગાવ્યો હતો કે, આ પક્ષો સામાન્ય પરિવારની તમિલ મહિલાઓને સત્તાના સર્વોચ્ચ શિખરો પર જોવા નથી માંગતા. તેમણે મહિલા અનામતના પ્રયાસને પાટા પરથી ઉતારવા માટે વિપક્ષની ‘ક્ષુદ્ર રાજનીતિ’ને જવાબદાર ગણાવી હતી.
“આ અંત નથી, માત્ર શરૂઆત છે”
પીએમ મોદીએ ભાવુક અને આક્રમક અંદાજમાં કહ્યું કે, "હું તમારી વચ્ચે આજે મારો ગુસ્સો અને નિરાશા વ્યક્ત કરવા આવ્યો છું. અમે સામાન્ય પરિવારોની બહેનો સંસદમાં આવે તે માટે ઐતિહાસિક પગલું ભર્યું હતું, પરંતુ DMK અને કોંગ્રેસે તેને નફરતનું લક્ષ્ય બનાવ્યું. પરંતુ યાદ રાખજો, આ અંત નથી; આ તો માત્ર શરૂઆત છે. ભાજપ અને NDA તમારી લડત ચાલુ રાખશે." તેમણે ઉમેર્યું કે જો આ બિલ પસાર થયું હોત, તો 2011ની વસ્તી ગણતરી મુજબ તમિલનાડુને અનેક નવી બેઠકો મળી હોત અને મહિલા પ્રતિનિધિત્વ વધ્યું હોત.
પરિવારવાદ અને કાળા કપડાં પર કટાક્ષ
તાજેતરમાં વિપક્ષ દ્વારા કરવામાં આવેલા વિરોધ પ્રદર્શનના સંદર્ભમાં મોદીએ કહ્યું કે, "કાળા કપડાં પહેરીને DMK પોતાના ખોટા ઇરાદાઓને છુપાવી શકશે નહીં. લોકો તમારા કાળા કાર્યોને સારી રીતે જાણે છે." તેમણે આરોપ લગાવ્યો કે DMK અને કોંગ્રેસ જેવા ‘એક-પરિવારના પક્ષો’ માત્ર એવું જ ઈચ્છે છે કે સત્તા તેમના પોતાના પરિવાર પૂરતી જ સીમિત રહે. સામાન્ય મહિલાઓનો ઉદય તેમને પચતો નથી, તેથી જ તેમણે બિલનો વિરોધ કરીને તમિલ મહિલાઓને મળેલી સુવર્ણ તક છીનવી લીધી છે.
સીટ ઘટાડાના ભયને ગણાવ્યો ખોટો
વડાપ્રધાને તમિલનાડુમાં બેઠકો ઘટવાની આશંકાઓને ફગાવી દેતા કહ્યું કે DMK પાસે કોઈ સિદ્ધિઓ નથી, તેથી તેઓ ખોટો ભય ફેલાવી રહ્યા છે. તેમણે કહ્યું કે અગાઉ DMK વર્તમાન પ્રમાણસર ગુણોત્તર જાળવવા સંમત થયું હતું, પરંતુ હવે રાજકીય ફાયદા માટે ‘યુ-ટર્ન’ લીધો છે.
રેલીના અંતે પીએમ મોદીએ તમિલનાડુની દરેક મહિલાને વિનંતી કરી કે તેઓ DMK ના નેતાઓને પૂછે કે તેમણે આ તક કેમ નકારી. તેમણે આશા વ્યક્ત કરી કે 23 એપ્રિલના રોજ મતદાનના દિવસે મહિલાઓ પોતાના મતના અધિકારથી વિપક્ષને સચોટ જવાબ આપશે.