ગુરુગ્રામ : ગુરુગ્રામના બાદશાહપુર પોલીસ સ્ટેશન વિસ્તાર હેઠળના સોહના રોડ પર રવિવારે સવારે લગભગ 5 વાગ્યાના સુમારે એક અત્યંત ગંભીર માર્ગ અકસ્માત સર્જાયો હતો, જેમાં પૂરપાટ ઝડપે આવી રહેલી એક બેકાબૂ ફોર્ચ્યુનર કારે રસ્તાના કિનારે ફૂટપાથ પર સૂતેલા બે નબળા વૃદ્ધોને દારૂણ રીતે કચડી નાખ્યા હતા.
બાદશાહપુરથી સોહના તરફ જઈ રહેલી આ કાર ઇરિયા મોલ નજીક પહોંચતાં ડ્રાઇવરે સ્પીડ પરથી કાબૂ ગુમાવી દીધો હતો અને વાહન સીધું ફૂટપાથ પર ચડી ગયું હતું. ફૂટપાથ પર સૂતેલા બે વૃદ્ધોને જોરદાર ટક્કર મારી ગંભીર રીતે ઇજાગ્રસ્ત કર્યા બાદ કાર સામે ઉભેલી એક ક્રેન સાથે ધડાકાભેર અથડાઈ હતી. આ ટક્કર એટલી ભયાનક હતી કે ફોર્ચ્યુનર કારના એરબેગ્સ તાત્કાલિક ખુલી ગયા હતા, અને કારમાં સવાર એક યુવક તથા એક મહિલા વાહનને ઘટનાસ્થળે જ છોડીને ભાગી ગયા હતા.
બનાવ અંગેની જાણ થતાં જ સ્થાનિકોની મદદથી રક્તરંજિત હાલતમાં બંને ગંભીર રીતે ઘવાયેલા વૃદ્ધોને તાત્કાલિક સારવાર માટે હોસ્પિટલમાં દાખલ કરવામાં આવ્યા હતા. ઘટનાસ્થળે પહોંચેલી પોલીસે અકસ્માતગ્રસ્ત વાહનને કબજે લઈ સમગ્ર વિસ્તારના સીસીટીવી ફૂટેજ ચકાસવાની કાર્યવાહી હાથ ધરી હતી.
ગુરુગ્રામના સોહના રોડ અને એલિવેટેડ હાઇવે પર રાત્રિ તથા વહેલી સવારે બેફામ ગતિએ ચાલતા લક્ઝરી વાહનો અને ઓવરસ્પીડિંગના કારણે અગાઉ પણ અનેક ગંભીર અકસ્માતો નોંધાયા છે. બાદશાહપુર પોલીસે આ ઘટના અંગે ગુનો નોંધીને સ્થળ પરથી ભાગી છૂટેલા કારચાલક યુવક અને મહિલાની ભાળ મેળવવા તથા તેમની ધરપકડ કરવા ચક્રો ગતિમાન કર્યા છે.