કોલકાતા: પશ્ચિમ બંગાળના રાજકારણમાં હાલમાં વિરોધ પ્રદર્શનનો એક નવો અને ચોંકાવનારો ટ્રેન્ડ જોવા મળી રહ્યો છે. રાજ્યમાં ૪ મેના રોજ જાહેર થયેલા ચૂંટણી પરિણામો બાદથી તૃણમૂલ કોંગ્રેસ (ટીએમસી) ના ટોચના નેતાઓ પર સતત ઇંડા ફેંકવાની ઘટનાઓ સામે આવી રહી છે. વિપક્ષી નેતાઓ આ સ્થિતિને લોકશાહીના બદલે મજાકમાં "ઓવોક્રેસી" અથવા "અંડકોષીતા" (ઇંડાનું શાસન) કહી રહ્યા છે. આ અનોખો વિરોધ સોશિયલ મીડિયા પર પણ ભારે વાયરલ થઈ રહ્યો છે, જેનાથી કંટાળીને હવે ટીએમસીના એક નેતાએ કેન્દ્રીય ગૃહમંત્રી અમિત શાહને પત્ર લખીને હસ્તક્ષેપ કરવાની માંગ કરી છે.

આ ઇંડા હુમલાનો ભોગ બનેલા નેતાઓમાં કોઈ સામાન્ય કાર્યકરો નહીં પરંતુ પાર્ટીના દિગ્ગજ ચહેરાઓ સામેલ છે. દક્ષિણ ૨૪ પરગણાના સોનારપુરમાં અભિષેક બેનર્જી પર જનતાએ "ચોર, ચોર" ના નારા સાથે ઇંડા અને પથ્થરો ફેંક્યા હતા. ત્યારબાદ કલકત્તામાં મમતા બેનર્જીના ઘરની બહાર મીડિયા સાથે વાત કરી રહેલા કુણાલ ઘોષના માથા પર સીધું ઇંડું વાગ્યું હતું. આ ઉપરાંત કમરહાટીમાં મદન મિત્રા અને રાણીગંજમાં સૌમિત્ર બેનર્જી પર પણ આ પ્રકારે હુમલાઓ થયા છે, જેને કારણે નેતાઓને પોતાના કાર્યક્રમો અધવચ્ચે જ છોડીને ભાગવું પડ્યું છે.

બીજેપી નેતા અગ્નિમિત્ર પોલે આ મુદ્દે મમતા બેનર્જી અને અભિષેક બેનર્જી પર આકરા પ્રહારો કરતા જણાવ્યું છે કે, આ છેલ્લા ૧૫ વર્ષના અત્યાચાર સામે સામાન્ય જનતાનો આક્રોશ છે. બજારમાં હવે ખાવા માટે અને વિરોધમાં મારવા માટે અલગ-અલગ પ્રકારના ઇંડા વેચાઈ રહ્યા હોવાની પણ ચર્ચાઓ છે. ટીએમસી આ ઘટનાઓને પૂર્વનિયોજિત હુમલા ગણાવી રહી છે, જ્યારે વિરોધ પક્ષો તેને જનતાનો અવાજ ગણાવી રહ્યા છે. ચૂંટણી બાદ હિંસા માટે જાણીતા બંગાળમાં આ વખતે ઇંડા દ્વારા થતો આ અહિંસક છતાં અપમાનજનક વિરોધ સમગ્ર દેશમાં ચર્ચાનો વિષય બન્યો છે.