કટની : જબલપુરના કટની જિલ્લાના કાચગુવા ગામમાં મુખ્ય માર્ગ પર આવેલી ભંગારની દુકાનમાં લાગેલી ભીષણ આગમાં 52 વર્ષીય રઘુનાથ પટેલનું કરુણ મોત નિપજ્યું છે. શનિવારે રાત્રે લાગેલી આ આગ એટલી વિકરાળ હતી કે માલિકને બહાર નીકળવાની તક સુધ્ધાં મળી નહોતી. ઘટનાની જાણ થતા જ દોડી આવેલા પુત્ર પંકજે ગંભીર રીતે દાઝી ગયેલા પિતાને હોસ્પિટલ ખસેડ્યા હતા, પરંતુ ફરજ પરના તબીબોએ તેમને મૃત જાહેર કરતા પરિવારમાં શોકનું મોજું ફરી વળ્યું છે.

જોકે, આ ઘટના બાદ રઘુનાથ પટેલના પરિવારે ગંભીર આક્ષેપો કરતા સમગ્ર મામલો ગરમાયો છે. પુત્રના દાવા મુજબ આ માત્ર અકસ્માત નથી, પરંતુ એક સુનિયોજિત હત્યા છે. પરિવારનો આરોપ છે કે ગામના જ તેજી લાલ ચૌધરી સાથે પિતાને જૂનો વિવાદ ચાલતો હતો અને તેની અદાવત રાખીને જ પિતાને પતાવી દેવામાં આવ્યા છે. આરોપ મુજબ, પુરાવાનો નાશ કરવા માટે હત્યા કર્યા બાદ દુકાનને આગના હવાલે કરી દેવામાં આવી હતી.

હાલ પોલીસે આ મામલે ગુનો નોંધીને મૃતદેહને પોસ્ટમોર્ટમ અર્થે મોકલી આપ્યો છે. સ્ટેશન ઇન્ચાર્જ રાજેન્દ્ર મિશ્રાએ જણાવ્યું હતું કે, પ્રાથમિક દ્રષ્ટિએ આ આગની દુર્ઘટના જણાય છે, પરંતુ પરિવારના આક્ષેપોને ધ્યાને રાખીને હત્યા અને અકસ્માત એમ બંને પાસાઓ પર તપાસ કરવામાં આવી રહી છે. પોસ્ટમોર્ટમ રિપોર્ટમાં મૃત્યુનું ચોક્કસ કારણ સ્પષ્ટ થયા બાદ જ સત્ય બહાર આવશે, ત્યાં સુધી ગામમાં ભારેલા અગ્નિ જેવી સ્થિતિ પ્રવર્તી રહી છે.